Citigroup Россиядан 1,2 млрд доллар йўқотиш билан чиқиб кетишини эълон қилди

Дунёдаги энг йирик банклардан бири бўлган АҚШнинг Citigroup банки Россиядаги сўнгги активларини сотишини маълум қилди. Уларни харид қилувчи — Renaissance Capital тузилмасига кирувчи Россия компанияси бўлади, аммо унинг асл эгалари ҳақида ҳеч қандай маълумот йўқ.

Фото: picture-alliance/imageBROKER/S. Kiefer

АҚШ банк конгломерати Citigroup Россиядаги сўнгги бизнесини Renaissance Capital’га сотишини ва бунинг натижасида 1,2 миллиард доллар миқдорида зарар (йўқотиш) кўрилишини кутяпти, деб хабар берди. Бу ҳақдаги маълумотлар душанба куни, 29 декабрда Citigroup сайтида ва АҚШ Қимматли қоғозлар ва биржалар комиссияси (SEC) порталида эълон қилинди.

Citigroup қолган бизнес — унинг Россиядаги шуъба банки бўлган “Ситибанк”нинг қолган қисми тўлиқ равишда Renaissance Capital компаниясига сотилишини билдирди. Барча зарур рухсатномалар олинса, битим 2026 йилнинг биринчи ярмида имзоланиши ва якунига етказилиши кутилмоқда.

12 ноябр куни Владимир Путин алоҳида фармон чиқариб, Россиядаги “Ренессанс Капитал — Финансовий консультант” иштирокидаги бундай битимга рухсат берган эди.

Citigroup — АҚШ ва жаҳондаги энг йирик банклардан бири, унинг жами активлари 2,35 триллион долларни ташкил этади. Унинг таркибига 1993 йилда ташкил этилган Россиядаги “Ситибанк” ҳам киради. 2021 йилда Citi Россиядаги чакана (ритейл) бизнесини сотишга қарор қилган, 2022 йил март ойида эса сотувга қўйиладиган активлар рўйхати кенгайтирилган. Улардан бир қисми 2022 йил октябрда “Уралсиб” банкига сотилган.

2024 йил ноябрига қадар Renaissance Capital’нинг Россиядаги активлари Михаил Прохоровнинг ҳолдинги таркибида бўлган. Кейин “Ренессанс Капитал — Финансовий консультант” компанияси сотилган. Расман харидорлар сифатида компаниянинг ўз топ-менежерлари кўрсатилган. “Интерфакс” реестрига кўра, ҳозир бу компаниянинг 99,99 фоиз улуши “РКИП” АЖга тегишли. Бу фирма ортида ким тургани — номаълум.