Россиянинг “яширин флот”га мансуб кема капитани Францияда ҳибсга олинди

Мурманскдан йўлга чиққан ва Ўрта Ер денгизида ушланган Grinch танкери санкцияларни четлаб ўтиб, нефт маҳсулотларини Хитой ва Ҳиндистонга экспорт қилган, деб хабар беради BFMTV. Кема экипажининг барча аъзолари, капитан ҳам, Ҳиндистон фуқароларидир.

Фото: Ole Berg-Rusten/NTB/picture alliance

Аввалроқ ушланган, Европа Иттифоқи, Буюк Британия ва АҚШ санкциялари остида бўлган Grinch танкери капитани Францияда ҳибсга олинди. Бу ҳақда якшанба, 25 январ куни Франция ОАВ Марсел прокуратурасига таянилган ҳолда хабар қилди. Айтилишича, гап 58 ёшли Ҳиндистон фуқароси ҳақида кетмоқда.

Ҳозирда кема Франция жанубида, Марсел яқинидаги портда қўриқ остида турибди, қолган экипаж аъзолари — улар ҳам ҳиндистонликлар — кеманинг ўзида ушлаб турилмоқда. Улар сўроқ қилиниши кутилмоқда.

Прокуратура маълумотига кўра, Россиянинг “яширин флот”га мансубликда гумон қилинаётган танкер Мурманскдан келаётган бўлган. Ҳозир кеманинг ҳужжатлари ҳамда у қайси байроқ остида ҳаракатлангани ҳақидаги маълумотларнинг ҳаққонийлиги текширилмоқда. BFMTV ёзишича, Grinch Комор оролларининг сохта байроғи остида ҳаракатланган.

Франция телеканали маълумотига кўра, кема РФнинг “яширин флот” таркибига киради ва асосан нефт маҳсулотларини Хитой ва Ҳиндистонга экспорт қилиш билан шуғулланган. BFMTV шунингдек Grinch Буюк Британия санкция рўйхатига киритилганини кўрсатади.

Бундан ташқари, танкер ЕИ ва АҚШ санкциялари остида ҳам бор, аммо уларнинг “қора рўйхат”ида у бошқа номлар билан қайд этилгани айтилади.

22 январ куни Ўрта Ер денгизида Grinch танкери ушланганидан сўнг, Франция президенти Эммануэл Макрон операцияни ўтказишда Францияни бир нечта иттифоқчилар, жумладан Буюк Британия қўллаб-қувватлаганини билдирди. У шунингдек, кема халқаро санкциялар остида экани ва эҳтимол, сохта байроқ остида ҳаракатланганини қайд этди.

Россиянинг “яширин флот” асосан эски кемалардан иборат бўлиб, улар Ғарбнинг суғурта ва рўйхатдан ўтказиш тизимларидан ташқарида ишлатилади. Улар ёрдамида РФ Украинага қарши қуролли босқиндан кейин жорий этилган Европа Иттифоқи санкцияларини четлаб ўтади. Нефт сотишдан тушган даромадлар, шу жумладан Ҳиндистон ва Хитой каби мамлакатларга арзонлаштирилган нархларда сотишдан келган маблағлар, урушни молиялаштиришга йўналтирилади.