Россия Жиноят кодексига “совет халқи геноциди” бўйича янги моддалар киритилмоқда

Россия Давлат думаси “Улуғ Ватан уруши йилларида нацистлар томонидан совет халқига қарши содир этилган геноцидни инкор этиш ёки маъқуллаш, шунингдек, геноцид қурбонлари хотирасини ҳақорат қилиш” учун жиноий жавобгарлик жорий этиш ҳақидаги қонунни қабул қилди. Қонун лойиҳасининг иккинчи ва учинчи, яъни якуний ўқишлари 24 март, сешанба куни бўлиб ўтди. Биринчи ўқиш эса 26 февралда ўтказилган эди.

Иккинчи ўқишга келиб, қонун лойиҳасига яна бир тузатиш ҳам киритилди. Унга кўра, Россия ташқарисида жойлашган “совет халқи геноциди қурбонлари дафн этилган жойларни йўқ қилиш, шикастлаш ёки ҳақоратлаш” учун ҳам жиноий жавобгарлик белгиланиши назарда тутилмоқда.

Тегишли ўзгартишлар Россия Федерацияси Жиноят кодексининг 243.4- ва 354.1-моддаларига киритилиши таклиф этилмоқда. Унга кўра, мос равишда 2 миллиондан 5 миллион рублгача жарима, беш йилгача мажбурий меҳнат ёки шу муддатгача озодликдан маҳрум қилиш, шунингдек, 3 миллион рублгача жарима, мажбурий меҳнат ёки уч йилгача озодликдан маҳрум қилиш жазоси кўзда тутилган.

Қонун Россия президенти Владимир Путин имзолаб, расман эълон қилинганидан кейин 10 кун ўтиб кучга киради.

2022 йил апрелида Путин СССР ва нацистик Германиянинг мақсадлари ҳамда ҳаракатларини “очиқча тенглаштириш”, шунингдек, Иккинчи жаҳон урушида СССРнинг “ҳал қилувчи роли” ва “инсонийлик миссияси”ни инкор этиш учун маъмурий жавобгарлик белгилайдиган қонунни имзолаган эди.

Қонунбузарларга 1000 рублдан 2000 рублгача жарима ёки 15 суткагача қамоқ жазоси таҳдид қилади. Мансабдор шахслар учун жарима 2000 рублдан 4000 рублгача, юридик шахслар учун эса 10 000 рублдан 50 000 рублгача этиб белгиланган.

Қоида такроран бузилган тақдирда, фуқаролар учун жарима 5000 рублгача, мансабдор шахслар учун 20 000 рублгача, юридик шахслар учун эса 100 000 рублгача оширилади. Бундан ташқари, мансабдор шахсларга олти ойдан бир йилгача лавозим эгаллаш ҳуқуқидан маҳрум этиш жазоси, юридик шахсларга эса 90 суткагача маъмурий фаолиятни тўхтатиб қўйиш жазоси қўлланиши мумкин.