Руферлар Empire State Building чўққисида акция ўтказди

Россиялик руферлар Ангела Николау ва Иван Биркус Ню-Йорк шаҳридаги машҳур Empire State Building осмонўпар биносининг чўққисига ноқонуний равишда чиқиб, у ерда баннер илди. Шунингдек, Иван Биркус севгилисига турмуш қуриш таклифини қилди. Ҳодисадан сўнг жуфтлик Ню-Йорк полицияси томонидан қўлга олинди.

Фото: Reuters

Ҳодиса 1 июл куни маҳаллий вақт билан кундузи содир бўлган. 33 ёшли Ангела Николау ва 32 ёшли Иван Биркус (Кузнецов) юзларига ниқоб таққан ҳолда Empire State Building биноси шпилига кўтарилишга муваффақ бўлган.

Бинонинг умумий баландлиги шпили билан бирга 443 метрни ташкил этади. Руферлар чўққига чиққанидан сўнг шпилга «Муҳаббат ҳокимиятга бўлган ҳирсдан кучли бўлганида, дунёда тинчлик қарор топади» деган ёзув туширилган қора баннерни маҳкамлаган. Бу ибора кўпинча америкалик машҳур гитарачи Жимми Хендриксга нисбатан келтирилади.

Шундан сўнг Иван Биркус бинодаги майдончада тиз чўкиб, узоқ йиллардан бери муносабатда бўлиб келаётган Ангела Николауга турмуш қуриш таклифини билдирган. Қиз таклифни қабул қилган ва кейинроқ ижтимоий тармоқларда узук таққан суратини эълон қилган.

Жуфтлик бу воқеани ўзининг Instagram саҳифалари орқали жонли эфирда ҳам намойиш қилган.

Бироқ улар бинодан тушиб келгач, Ню-Йорк полицияси томонидан қўлга олинган. ОАВ маълумотларига кўра, уларга ноқонуний равишда хусусий ҳудудга кириш, хавфсизлик талабларини бузиш, мулкка зарар етказиш, жамоат тартибини бузиш, бузиб кириш воситаларини сақлаш ҳамда бошқа бир қатор қонунбузарликлар бўйича айбловлар қўйилиши мумкин.

Дастлабки маълумотларга кўра, руферлар бинодаги ташриф буюрувчилар учун ёпиқ бўлган 103-қаватга чиқишга муваффақ бўлган. Терговчилар улар айнан қандай йўл билан бу ерга киргани ва шпилга чиққанини аниқламоқда.

Empire State Building маъмурияти эса руферларнинг ҳаракатлари бино ижарачилари ёки сайёҳлар хавфсизлигига таҳдид солмаганини маълум қилди. Шу билан бирга, маъмурият ушбу машҳур кузатув майдончаси турмуш қуриш таклифини билдириш учун энг муносиб жойлардан бири эканини ҳазиломуз тарзда таъкидлади.

Ангела Николау ва Иван Биркус 2016 йилдан бери биргаликда экстремал руфинг билан шуғулланиб келади. Улар шу вақт ичида дунёнинг бир қатор машҳур баланд иншоотларига чиққан. Жумладан, 2016 йилда Хитойнинг Тянцзин шаҳрида қурилиши тугалланмаган қарийб 597 метрли Goldin Finance 117 осмонўпар биносига чиққан.

Жуфтлик ҳақида суратга олинган «Skywalkers: Бир жуфтлик тарихи» ҳужжатли филми 2024 йилда АҚШдаги Sundance кинофестивалида намойиш этилган. Кейинчалик филмни тарқатиш ҳуқуқини Netflix компанияси сотиб олган ва у стриминг платформасига жойлаштирилган.