Ўзгидромет маълумотига кўра, ой давомида ҳаво ҳарорати кескин ўзгариб турган. Июлнинг дастлабки кунларида нисбатан салқин об-ҳаво кузатилган бўлса, иккинчи беш кунликдан бошлаб ҳарорат изчил кўтарилган.
Энг кучли иссиқ тўлқини 18–19 июл кунлари кузатилиб, республиканинг катта қисмида ҳаво ҳарорати 43–46 даражага, жанубий ва чўл ҳудудларида эса 46–50 даражагача етган. Кузатилган кўрсаткичлар мамлакат метеорологик кузатувлари тарихидаги мутлақ максимумларга яқинлашиб, қатор ҳудудларда янги рекордлар ўрнатилган.
Жумладан, Нурафшон, Бухоро, Навоий, Учқудуқ, Самарқанд, Каттақўрғон, Арнасой, Шаҳрисабз, Андижон, Наманган, Фарғона ва яна бир қатор метеостанцияларда мутлақ максимал ҳаво ҳарорати бўйича аввалги рекордлар янгиланган.
Тошкент шаҳрида энг юқори ҳарорат 19 июл куни қайд этилиб, термометрлар 44,3 даражани кўрсатган. Бу 1997 йилда ўрнатилган мутлақ рекорддан атиги 0,3 даража паст бўлган.
Ҳисоботга кўра, июл ойида ҳаво ҳарорати 40 даража ва ундан юқори бўлган кунлар сони марказий ва шарқий ҳудудларда 3–8 кунни, бошқа ҳудудларда 9–18 кунни, энг жанубий ва Қизилқумнинг айрим жойларида эса 19–23 кунни ташкил этган. Бу кўрсаткичлар кўп йиллик ўртача қийматлардан анча юқори бўлган.
