DW хабарига кўра, дастур ҳақидаги маълумот 2 октябр куни Аргентинанинг расмий давлат порталида эълон қилинган.
Дастурда иштирок этишнинг икки варианти белгиланган: биринчиси — давлат ғазнасига қайтарилмайдиган маблағ ўтказиш, иккинчиси — махсус давлат облигациясига инвестиция киритиш.
Ариза берувчиларнинг шахси ва маблағлари текширувдан ўтказилиши назарда тутилган.
Оила аъзолари учун қўшимча бадал тўланади
Инвесторнинг турмуш ўртоғи ва фарзандлари ҳам фуқаролик олиш учун ариза топшириши мумкин. Бироқ улар учун қўшимча маблағ талаб этилади.
Турмуш ўртоғи, шунингдек, никоҳдан ўтмаган ва фарзанди бўлмаган 18–25 ёшдаги ҳар бир фарзанд учун 100 минг доллардан қўшимча бадал белгиланган.
18 ёшга тўлмаган ҳар бир фарзанд учун эса 25 минг доллар тўлаш керак бўлади.
Расмий баёнотда келтирилган мисолга кўра, асосий ариза берувчи, унинг турмуш ўртоғи ва икки нафар вояга етмаган фарзандидан иборат оила жами 500 минг доллар тўлаб, Аргентина фуқаролигига ариза бериши мумкин. Бу ҳисоб қайтарилмайдиган бадал вариантига мос келади.
Маблағ қаердан олингани текширилади
Аргентина ҳукумати дастур доирасида пул ювиш ва терроризмни молиялаштиришга қарши халқаро стандартларга риоя қилишини билдирган.
Текширувда ариза берувчининг шахси, обрў-эътибори, судланганлик ҳолати ва миграция тарихи ўрганилади.
Шунингдек, маблағларнинг қонуний келиб чиқиши ҳамда улар боғлиқ бўлган юрисдикциялар бўйича хавфлар баҳоланади.
Аргентина дастур орқали сармоя жалб қилмоқчи
Аргентинада «олтин паспортлар» дастурини жорий этиш режалари ҳақида аввалроқ Financial Times ёзган эди.
Нашрга кўра, мамлакат шу йўл билан яқин йиллардаги қарз мажбуриятларини қоплаш учун ўнлаб миллиард доллар жалб қилишни кўзламоқда.
DW Аргентина бундай дастурга эга Жанубий Америкадаги биринчи давлат бўлишини қайд этган. Хабарда Аргентина фуқаролари қарийб 170 давлатга визасиз кириши мумкинлиги ҳам келтирилган.
