Iroq bosh vaziri Bag‘dod shahri xavfsizlik xizmati rahbarini vazifasidan ozod etdi

Iroq hukumati raisi Haydar al Abadi Bag‘dod shahri xavfsizlik xizmati rahbari Abbud Kanbarni vazifasidan chetlashtirdi, deb xabar qilmoqda Associated Press.

Poytaxt aholisining shahar xavfsizligiga oid norozilik kayfiyati kuchayib borayotgani, hukumatning keskin qaror qabul qilishiga sabab bo‘lgan. O‘tgan haftada, Bag‘dodda amalga oshirilgan xunrezliklarda 290ga yaqin odam qurbon bo‘lgan edi. Rasmiy ma'lumotlarga ko‘ra, halok bo‘lganlarning soni 186 nafarni tashkil etadi. 

Al Abadiyning bayonotida, terror tahdidiga qarshi yangi choralara ko‘rilgani ta'kidlangan bo‘lsa-da, ularga oydinlik kiritilmagan. 

Qayd etish joizki, Kanbar vazifasidan bo‘shatilgach, bir necha soat o‘tib, Iroq poytaxtida yana bir terakt sodir etilgan. Shialar maqbarasida sodir etilgan portlashda 37 kishi halok bo‘lgan.