DW nashri dpa agentligiga tayanib xabar berishicha, Iroq hukumati vakili bu haqda 28-sentabrga oʻtar kechasi bayonot bergan.
«Barcha jangovar boʻlinmalar va logistika taʼminotini amalga oshirgan kuchlar mamlakatni tark etdi», - degan hukumat vakili.
AQSH va Iroq Amerika qoʻshinlarini olib chiqish boʻyicha 2024-yilda kelishuvga erishgan edi. Vashington maʼlumotlariga koʻra, soʻnggi yillarda Iroqda qariyb 2 500 nafar AQSH harbiysi joylashtirilgan.
Amerikaning soʻnggi boʻlinmalari Kurdiston mintaqasidagi Erbil shahrida, Bagʻdod aeroporti yaqinidagi harbiy bazada va poytaxtning hukumat idoralari joylashgan «yashil hudud»ida boʻlgan.
IShIDga qarshi operatsiya
AQSH va uning ittifoqchilari 2014-yildan buyon Iroq hamda Suriyada ISHID terrorchilik tashkilotiga qarshi kurash olib borgan.
Tashkilot har ikki mamlakatda ilgari nazorat qilgan katta hududlarini yoʻqotgan boʻlsa-da, uning ayrim yashirin guruhlari saqlanib qolgan va hamon terrorchilik hujumlarini sodir etmoqda.
dpa qayd etishicha, Erondagi urush fonida Iroqdagi xavfsizlik vaziyati ham yomonlashgan. Mojaro davomida mamlakatdagi AQSH obyektlari va kurd kuchlarining obyektlariga hujumlar uyushtirilgan.
Qurolli guruhlarni qurolsizlantirish kechiktirildi
Agentlik maʼlumotiga koʻra, AQSH qoʻshinlarini olib chiqish muddati tugaydigan 28-sentabr kuni Iroqda «Mustaqillik kuni» sifatida bayram tadbirlari oʻtkazilishi kutilmoqda. Shu kuni barcha davlat muassasalari yopiq boʻlishi aytilgan.
Avvalgi rejaga muvofiq, Amerika qoʻshinlari chiqib ketishi bilan bir vaqtda Eronga aloqador qurolli guruhlar qurolsizlantirilishi, ularning aʼzolari esa davlat kuch tuzilmalari tarkibiga kiritilishi kerak edi.
Biroq Iroq bosh vaziri Ali az-Zaydiy bu chora 2027-yil iyunigacha kechiktirilishini eʼlon qilgan.
Germaniya Erbildagi ishtirokini saqlab qolishi mumkin
AQSH va uning ittifoqchilari 2003-yilda Saddam Husayn hokimiyatini agʻdarish maqsadida Iroqqa bostirib kirgan edi. Keyinchalik mamlakatdagi xalqaro harbiy ishtirokning asosiy yoʻnalishlaridan biri IShIDga qarshi kurash boʻldi.
