AQSH va uning ittifoqchilari Iroqdagi «Mustahkam qatʼiyat» harbiy operatsiyasini rasman yakunladi. Tegishli bayonotni Pentagon matbuot kotibi Shon Parnell eʼlon qildi. Operatsiya 2014-yilda ISHID terrorchilik tashkilotiga qarshi kurashish maqsadida boshlangan edi.
«Erbil aviabazasidan koalitsiya kuchlari va texnikasining tartibli ravishda olib chiqilishi Iroqda ISHID tor-mor etilgan harbiy missiyaning muvaffaqiyatli yakunlanganini anglatadi» - deb taʼkidladi Parnell.
Operatsiya «AQSH va Iroqning 2024-yil sentabrdagi qoʻshma bayonotiga muvofiq va Amerikaning milliy manfaatlarini taʼminlash maqsadida» yakunlandi, deb qayd etdi rasmiy. Uning soʻzlariga koʻra, Pentagon Iroq xavfsizlik kuchlari, jumladan, Iroq Kurdistoni endi «mamlakat xavfsizligini yanada ishonchli taʼminlashda» va «terrorchi guruh qoldiqlarini bostirishda» yetakchi rol oʻynashini kutmoqda. AQSH kadrlar tayyorlash va razvedka maʼlumotlari bilan oʻrtoqlashish orqali yordam koʻrsatishda davom etadi, deb qoʻshimcha qildi Pentagon vakili.
Amerika qoʻshinlari 2003-yildan beri Iroqda boʻlib kelayotgan edi. 2007-yilda terrorizmga qarshi operatsiyalarning eng avj pallasida ularning soni 170 ming kishidan oshdi, shundan soʻng 2011-yilda minimal darajagacha qisqartirildi. 2014-yilda terrorchilarga qarshi kurashish uchun kontingent yana koʻpaytirildi va 2021-yilga kelib jangarilar egallab turgan hududlar ustidan nazoratni yoʻqotdi. Oʻshanda Iroqda 2,5 ming nafar AQSH harbiy xizmatchisi bor edi.
2024-yilda AQSH va Iroq Amerika qoʻshinlarini bosqichma-bosqich olib chiqish boʻyicha kelishuvga erishgan edi. 2026-yil iyul oyida AQSH prezidenti Donald Tramp Iroqdagi amerikalik harbiy xizmatchilar ishtiroki endi «kerak emas»ligini maʼlum qildi.
