Rossiyada o‘g‘rilarning e'tiborini ko‘proq tortgan mashinalar ma'lum qilindi

8. BMW X5

Ma'lumotlarga ko‘ra, 2016 yilning birinchi yarmida BMW mashinalarini o‘g‘irlash soni keskin ko‘tarilgan: o‘tgan yili atigi 7ta shu marka modeli o‘g‘irlangan bo‘lsa, bu yilgi raqam 27tani tashkil etmoqda. Ular orasida X5 (6ta) krossoverining oldiga tushadigani yo‘q. 7-series lyuks sedani va birmuncha arzonroq 3-series modellaridan 5tadan gumdon qilingan. BMW X5ning eng arzoni 4,5 mln rubl turishini bir tasavvur qiling-a. 

7. Renault Duster

Shuni yana bir bora eslatib qo‘yish kerakki, mashinangizning arzonroq bo‘lishi, uning o‘g‘ri nigohiga tushmasligiga kafolat bermaydi. Renault modelidan 2016 yilning ilk 6 oyida 30ta o‘g‘irlanishi fikrimizni isbotlaydi (2015 yilning shu davrida 40ta). Bunda eng ko‘pi Duster krossoveri hissasiga to‘g‘ri keladi. Garchi uning narxi 630 ming rubldan boshlansa-da, bu modeldan 22ta o‘g‘irlangan. Renault Logan (4dona) unchalik ham qiziqish uyg‘otmasligi aniqlangan. 

6. Mazda CX-5

Yaponiyaning yana bir modelini o‘g‘irlash hajmi shu yilning olti oyi mobaynida 50 foizga ko‘payib, o‘tgan yilgi 21 donadan 32taga yetgan. Bunda ayniqsa, CX-5 krossoveri egalari ehtiyotkorroq bo‘lganlari yaxshi. Olti oy ichida 1,3 mln rubldan boshlanadigan modeldan 22tasi o‘g‘irlangan. 

5. Lada Granta

Ha, adashmadingiz, aynan Rossiyada ishlab chiqariluvchi mahalliy avtosanoat vakili Lada Granta. Aslida avtoo‘g‘rilar mahalliy mashinalarni o‘g‘irlashni ancha yaxshi ko‘rishadi. Ularni o‘g‘irlash ham oson, sotish ham. 2016 yilning birinchi yarim yilligida 31ta Lada (2015 yili 39ta) o‘g‘rilar oviga tushgan. Bular orasida eng ko‘p o‘g‘irlangani Granta (9ta), shuningdek, 4x4 yo‘ltanlamasi hamda Largus miniveni ham anchagina ommabop. 

4. GAZel Next

Kutilmaganda, jinoiy guruhlar olamida tijorat transport vositalariga ham talab oshib borayotganini anglash mumkin. Masalan, Rossiyaning GAZ avtomobil zavodi mahsuloti. Bu yilning olti oyida 39ta Next xususiy va tijorat firmalari hisobidan o‘g‘rilarning cho‘ntagiga po‘l ko‘rinishida borib tushgan. Ammo, o‘tgan yili ushbu mashinalarning o‘g‘irlanishi yanada ko‘proq (55ta) edi. 

3. KIA Rio

KIA avtomobillarining o‘g‘irlanishi shu yilning o‘tgan olti oyi mobaynida 80 foizga o‘sganini alohida ta'kidlash kerak. Axir, mashina xarid qilishda bu ma'lumotlar avtomobil modelini tanlashda qo‘l keladi, albatta. Agar, 2015 yilning birinchi yarmida 26ta KIA o‘g‘irlangan bo‘lsa, bu yilning shu davri mobaynida 47ta Janubiy Koreya mashinasi olib qochilgan. Bunda ularning 32tasi Rio hissasiga to‘g‘ri kelmoqda. 

2. Toyota Land Cruiser 200

Rossiyada eng ko‘p o‘g‘irlanadigan avtomobillar orasida Yaponiya avtosanoatining yana bir ko‘zga ko‘ringan vakili bor. U ham bo‘lsa Toyota modellaridir. Joriy yilning olti oyida 51 dona shu rusumdagi mashina o‘g‘irlangan bo‘lib, bu o‘tgan yilgi ko‘rsatkichdan 15 foiz (60ta)ga kamdir. Ular orasida eng ko‘p o‘g‘irlangani esa lyuks toifasidagi Land Cruiser 200 (18ta) hisoblanadi. Yangi Land Cruiser 200 avtosalonda 4 mln rubldan boshlanadi. Biroq, Toyota Camry biznes-sedani (15ta) ham o‘g‘rilarning diqqat markazida turishi ma'lum qilinmoqda. 

1. Hyundai Solaris

Va nihoyat, salbiy statistikaning yetakchisi bu Janubiy Koreyaning Hyundai kompaniyasi mahsuloti bo‘ldi. Bu model nafaqat o‘g‘irlash soni, balki sur'atlari bo‘yicha ham birinchi o‘rinni zabt etib turibdi. O‘tgan yilning yanvar-iyun oylarida jami 21ta Hyundai mashinasi o‘g‘irlangan bo‘lsa, bu yil o‘g‘rilarning tanlovi ko‘proq shu marka mahsulotlarida to‘xtagan. 2016 yilning birinchi yarim yilligida ulardan 60 dona olib qochilgan. Shunday qilib, bu rusumdagi mashinalarning o‘g‘irlanish holati 185 foizlik o‘sishni qayd etgan. Rossiya avtobozorida eng ko‘p sotilayotgan Hyundai Solaris eng ko‘p o‘g‘irlanayotgan avtomobillar ro‘yxatida ham yetakchilik qilayapti. Olti oyda narxi 591 ming rubldan boshlanuvchi mashinadan 45tasi o‘g‘irlangan.