Janubiy Koreya Afg‘oniston iqtisodiyotini tiklashga 120 mln dollar yordam ko‘rsatadi

Janubiy Koreya tashqi ishlar vaziri Yun Byon Sening bayonot berishicha, mamlakat hukumati Afg‘oniston iqtisodiyotini tiklash va ijtimoiy dasturlarga 120 mln dollar miqdorida yordam ko‘rsatadi, deb xabar qilmoqda «Yonxap» agentligi.

«Koreya Respublikasi hukumati 4 yillik reja ishlab chiqqan bo‘lib, unga muvofiq har yili 30 mln dollardan ajratiladi», — degan tashqi ishlar vaziri.

Qayd etilishicha, bu mablag‘ Afg‘onistonga taqdim etilayotgan yillik yordamning 0,78 foizini tashkil etadi. 

Bryusselda Afg‘onistonni tiklash masalalariga bag‘ishlangan xalqaro konferensiya bo‘lib o‘tgan. Unda 75 mamlakat va 25 gumanitar tashkilot vakillari ishtirok etgan. Ular, ushbu mamlakatga ko‘rsatilayotgan moliyaviy ko‘mak miqdorini 2020 yilgacha hozirgi hajmda saqlab qolishga kelishilgan.