29-30 oktabr kunlari Yevropada milliy chempionat o‘yinlari davom ettiriladi. Futbol muxlislarini bir qator qiziqarli o‘yinlar kutmoqda.
APL. "Tottenhem" - "Lester" (Shanba, 29 oktabr, Match! Futbol 1, 19:00)
APLning 10-tur doirasidagi markaziy uchrashuv Londonda kechadi. "Tottenhem" o‘z maydonida "Lester"ni qabul qiladi. Ayni paytda turnir jadvalida bu jamoalar bir-birini quvishda davom etmoqda. O‘tgan mavsumda ham ular chempionlik uchun oxirgi turlarga qadar kurashgan edi. O‘shanda "Lester"ning qo‘li baland kelgandi. Bu safar ular APLning 10-turida to‘qnash keladi. Bu o‘yinga qadar "shporlar" tarkibida yo‘qotishlar bor. Asosiy tarkibning bir nechta futbolchilari jarohatlari sababli "Lester" bilan o‘yinni o‘tkazib yuboradi.
"Spartak" - TsSKA (Shanba, 29 oktabr, Match TV, 20:00)
Rossiya chempionatida ko‘pchilik kutayotgan bahs bugun Moskvada bo‘lib o‘tadi. Bir qarashda, Moskva derbisida "Spartak" TsSKAni qabul qiladi. Yangi stadionda bo‘lib o‘tadigan uchrashuvda chiqarilgan barcha chiptalar sotib bo‘lingan. O‘yinga bo‘lgan qiziqish sababli, ko‘pchilik ushbu o‘yinni sabrsizlik bilan kutmoqda. Joriy mavsumda "Spartak" yana kuchlilar qatoriga qaytdi va chempionlik uchun kurashmoqda. TsSKA esa doimiy ravishda peshqadamlar safida turibdi.
"Borussiya D" - "Shalke" (Shanba, 29 oktabr, Match! Futbol 3, 21:30)
Bundesliganing 11-turining markaziy uchrashuvi Dortmundda kechadi. "Borussiya" mavsumni o‘ta muvaffaqiyatsiz o‘tkazayotgan "Shalke"ni qabul qiladi. Ayni vaqtda mezbon jamoa bo‘lgan "Borussiya" ortda qolgan 10 turdan keyin turnir jadvalining 7-o‘rinida turibdi. "Shalke" esa 14-o‘rinni egallagan. Qizig‘i shundaki, ularning jadvalda egallagan o‘rinlari tafovuti 7tani tashkil qilsa, oraliqdagi ochkolari farqi ham aynan shuncha ekan. Xullas, Rur derbisida qaysi jamoaga omad kulib boqishini bugun ko‘rib olamiz.
"Yuventus" - "Napoli" (Shanba, 29 oktabr, Match TV, 23:45)
Oxirgi yillarda A seriyada "Yuventus"ga faqat "Napoli" jiddiy qarshilik qilmoqda. "Milan", "Inter" va "Roma"ning saviyasi tushib ketgani bois, hech bir jamoa turin klubiga qarshilik ko‘rsata olmayotgan edi. "Napoli" esa yildan-yilga kuchayib, A seriyada yetakchilardan biriga aylangan. Qolaversa, bugungi uchrashuvda Gonsalo Higuain sobiq jamoasiga qarshi dastlabki uchrashuvini o‘tkazadi.
"Rubin" - "Lokomotiv" (Yakshanba, 30 oktabr, Match TV, 21:30)
Ertaga Rossiya chempioanatining 12-tur doirasida yana bir qiziqarli bahs bo‘lib o‘tadi. "Rubin" uyda "Lokomotiv"ni qabul qiladi. E'tiborlisi ikkala jamoaning ayni vaqtda ochkolari soni bir xil. O‘zaro to‘qnashuvdagi g‘alaba qaysidir jamoani turnir jadvalida yuqori o‘ringa ko‘tarilishiga xizmat qilishi mumkin.
