Farg‘onada “Men o‘z kelajagim uchun ovoz beraman” shiori ostidagi “Saylov va yoshlar” forumi bo‘lib o‘tdi

Farg‘ona viloyat hokimligi, “Kamolot” yoshlar ijtimoiy harakati viloyati kengashi hamda siyosiy partiyalar hamkorligida “Men o‘z kelajagim uchun ovoz beraman” shiori ostida “Saylov va yoshlar” deb nomlangan forum bo‘lib o‘tdi. Unda Andijon, Namangan va Farg‘ona viloyatlari yoshlari ishtirok etdi.

Mamlakatimizda demokratik talablar va xalqaro standartlarga mos saylov tizimi shakllantirildi. Saylovlarga tayyorgarlik ko‘rish va uni yuqori saviyada o‘tkazish, fuqarolar, jumladan, yoshlarning saylov huquqlarini to‘la amalga oshirishi uchun shart-sharoit yaratish borasidagi qonunchilik izchil takomillashtirib borilmoqda.

Yoshlar demokratik islohotlarni yanada chuqurlashtirish va fuqarolik jamiyatini rivojlantirishga qaratilgan keng ko‘lamli islohotlarda faol ishtirok etayotir. Buni joriy yil 4 dekabrda O‘zbekiston Respublikasi Prezidentligiga bo‘lib o‘tadigan saylovga tayyorgarlik jarayonida ham kuzatish mumkin.

– Hozirgi davrda ertamiz egalarining siyosiy-huquqiy madaniyatini yuksaltirish, fuqarolik pozitsiyasini mustahkamlash har qachongidan dolzarb, – deydi “Kamolot” yoshlar ijtimoiy harakati viloyat kengashi raisi o‘rinbosari Ahadjon Akbarov. – “Yoshlar va saylov” forumi yigit-qizlarning mamlakatimizdagi siyosiy jarayonlarga mustaqil va ongli munosabatini shakllantirish, Konstitutsiyamiz va boshqa qonunlarga hurmat hissini kuchaytirish, saylovlarga munosib tayyorgarlik ko‘rish va ushbu siyosiy jarayon haqida ilk bor ishtirok etuvchi yosh saylovchilarning xabardorligini oshirishga qaratilgani bilan ahamiyatlidir.

Forum viloyat markazidagi Ahmad Farg‘oniy majmuasida boshlandi. Ular buyuk alloma haykali poyiga gulchambarlar qo‘ydi. Shundan so‘ng ishtirokchilar Farg‘ona politexnika institutida bo‘lib, bu yerda amalga oshirilgan bunyodkorlik ishlari, talabalar uchun yaratilgan sharoitlar bilan tanishishdi. Mazkur institut binosida joylashgan O‘zbekiston Respublikasi Prezidenti saylovini o‘tkazuvchi 729-saylov uchastkasidagi saylovga tayyorgarlik ishlari ham yoshlarda katta taassurot qoldirdi.Saylov qonunchiligidagi o‘zgarish va yangiliklar, saylov komissiyalari faoliyatini samarali tashkil etish va boshqa masalalar bo‘yicha batafsil ma'lumot berildi.

– Men bu yil birinchi marta saylovda qatnashaman, – deydi Farg‘ona san'at kolleji o‘quvchisi Mohidil Qurbonova. – Bugungi forumda saylovda har bir saylovchining ovozi muhim ahamiyatga ega ekanini yanada chuqur angladim. Biz, yoshlarning zamonaviy bilim va kasb-hunar sirlarini puxta o‘zlashtirishimiz, iste'dod va salohiyatimizni keng namoyon etishimiz uchun barcha sharoit yaratilgan. Saylovda mamlakatimiz kelajagini belgilashdek muhim jarayonda o‘z ovozim bilan qatnashish imkoniyatiga ega bo‘lganimdan xursandman.

Shundan so‘ng vodiy yoshlari maxsus avtobuslarda Rishton tumani sari yo‘l oldilar. Faol yoshlar dastlab Respublikaga tanilgan, kulolchilik san'atini puxta egallagan usta kulollar ish faoliyati bilan yaqindan tanishdilar.

Yoshlar oddiy tuproqdan tayyorlangan sopol buyumlarni dunyo bozorini zabt etayotgani, mustaqillik yillarida kulolchilik yanada rivoj topayotganligini o‘z ko‘zlari bilan ko‘rishib, o‘z hayajonlarini yashira olishmadi.

-Men Rishtonlik kulollar to‘g‘risida matbuotda o‘qib, televideniya orqali ko‘rgan edim. Lekin bunchalik ustalarning mahoratini Rishton tumaniga kelib, o‘z ko‘zim bilan ko‘rib ularni sa'natiga qoyil qoldim. Kulollar yaratayotgan durdona asarlar Respublikamiz, qolaversa Farg‘ona viloyatini dovrug‘uni dunyoga taratishiga shak-shubha yo‘q- deydi Namangan viloyatidan kelgan forum ishtirokchisi Ma'murjon Ergashev.

Rishton tumanida videokonferensiya tarzida tadbir o‘tkazildi. Barcha shahar va tuman markazlarida yig‘ilgan yoshlar bilan ochiq va jonli muloqot bo‘ldi.Tadbirda yoshlar mamlakatimizda istiqlol yillarida eng yuksak demokratik talablar va umume'tirof etilgan xalqaro standartlar asosida yaratilgan milliy saylov tizimi, saylov jarayonida ochiqlik va oshkoralik prinsiplarini mustahkamlash maqsadida saylov qonunchiligiga kiritilayotgan o‘zgartishlarning ma'no-mazmuni bilan atroflicha tanishtirildi.

– Saylov – mamlakatimiz ijtimoiy-siyosiy hayotidagi muhim voqea, – deydi boks bo‘yicha o‘smirlar o‘rtasida Osiyo va jahon chempioni, II o‘smirlar Olimpiadasi g‘olibi, kattalar o‘rtasida Osiyo chempioni, jahon chempionati va Olimpiya o‘yinlari sovrindori Bektemir Meliqo‘ziyev. – Unda ishtirok etishning hayajoni va mas'uliyatini chuqur his qilmoqdamiz. FaMazkur forum mamlakatimizda o‘tkazilayotgan saylovlar mohiyati, ularda yoshlarning ishtiroki, saylovlarni o‘tkazish tartibi, saylov qonunchiligiga doir bilimimiz yanada boyimoqda. Bu bo‘lajak saylovda o‘z fuqarolik pozitsiyamizni erkin namoyon etishga yordam beradi.

Shundan so‘ng, vodiy yoshlarining yurtimizning butun yoshlariga saylovni yuqori saviyada, faollik bilan o‘tkazishga qaratilgan murojaati qabul qilinib, o‘qib eshitirildi.