Bosh prokuratura huzuridagi Departament xabariga koʻra, tezkor tadbir uning Qoʻshtepa tumani boʻlimi va boshqa huquqni muhofaza qiluvchi organlar hamkorligida oʻtkazilgan.
Maʼlum qilinishicha, fuqaro S.Q.ning Xumdon mahallasidagi issiqxonasi umumiy foydalanishdagi elektr tarmogʻiga hisoblagichdan tashqari ulangani yuzasidan dalolatnoma tuzilgan.
Qoʻshtepa tumani ETK muhandisi D.T. ushbu dalolatnomani yoʻq qilib berishni vaʼda qilgan. Departament maʼlumotiga koʻra, u buning evaziga 3 mln soʻm olgan vaqtida qoʻlga olingan.
Holat yuzasidan Jinoyat kodeksining 25 va 168-moddalari bilan firibgarlikka suiqasd qilish boʻyicha jinoyat ishi qoʻzgʻatilgan. Hozirda tergov harakatlari olib borilmoqda.
