DXX xabariga koʻra, tezkor tadbir xizmatning Fargʻona viloyati boʻyicha boshqarmasi hamda viloyat Ichki ishlar boshqarmasi xodimlari hamkorligida oʻtkazilgan.
Tadbirda Dangʻara tumanida faoliyat yurituvchi turfirma xodimi Umra ziyoratini tashkil etish uchun tegishli litsenziya mavjud boʻlmasa-da, fuqarolarni Saudiya Arabistoniga yuborishni taklif qilgani aniqlangan. U soʻralgan mablagʻning bir qismini olayotganda ashyoviy dalillar bilan ushlangan.
Hozirda mazkur shaxsga nisbatan jinoyat ishi qoʻzgʻatilgan, tergov harakatlari davom etmoqda.
Xabarda belgilangan tartiblarga rioya qilmay tashkil etilgan safarlar oqibatida ayrim fuqarolar xorijda qiyinchiliklarga duch kelayotgani qayd etilgan.
DXX fuqarolardan shu kabi qonunbuzilish holatlari haqida 1520 qisqa raqami orqali xabar berishni soʻragan. Murojaat qiluvchining shaxsi sir saqlanishi kafolatlanishi bildirilgan.
