09:38 / 15.11.2016
12798

«Qishloq qurilish bank»da murojaatlar bilan ishlash bo‘yicha boshqarma tashkil qilindi

2014 yil dekabr oyida qabul qilingan “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni talablari izchillik bilan hayotga tatbiq etilmoqda. Aholi va tadbirkorlarning murojaatlarini o‘z vaqtida hal etish maqsadida 2016 yil 24 sentabrdan ishga tushirilgan O‘zbekiston Respublikasi Bosh vazirining Internet tarmog‘idagi elektron qabulxonasi mazkur qonun ijro etilishini jadallashtirishga qaratilgan zamonaviy va o‘ziga xos yondoshuv bo‘ldi.

Murojaatlar bilan ishlash tizimini davlat siyosatining eng ustuvor yo‘nalishlardan biri sifatida yanada takomillashtirish maqsadida 2016 yil 27 oktabrda O‘zbekiston Respublikasi Vazirlar Mahkamasining “Vazirlik va idoralar, xo‘jalik birlashmalari rahbarlari, Qoraqalpog‘iston Respublikasi Vazirlar Kengashi Raisi, viloyatlar, shahar va tuman hokimlarining “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni talablarini so‘zsiz bajarish yuzasidan javobgarligi to‘g‘risida”gi qarori qabul qilindi.

Foto:qishloqqurilishbank.uz

Aktsiyadorlik tijorat “Qishloq qurilish bank” tizimida ham jismoniy va yuridik shaxslar murojaatlari bilan ishlash holatini tubdan takomillashtirishga qaratilgan kompleks chora-tadbirlar amalga oshirilmoqda. Mazkur masala bank Boshqaruvining qator majlislarida muhokama qilinib, bank tuzilmalarining murojaatlar bilan ishlash borasidagi faoliyati tanqidiy ko‘rib chiqildi. Shuningdek, bank markaziy apparatida Murojaatlar bilan ishlash bo‘yicha Ishchi guruhi faoliyati yo‘lga qo‘yildi.

“Qishloq qurilish bank” tizimida murojaatlar bilan ishlashning sifati va natijadorligini oshirish maqsadida bank Boshqaruvi qaroriga asosan yangi tuzilma - Jismoniy va yuridik shaxslarning murojaatlari bilan ishlash boshqarmasi tashkil qilindi. Mazkur boshqarmaga tegishli shtat birliklari ajratilib, ularga malakali kadrlar ishga jalb etildi.

Jismoniy va yuridik shaxslarning murojaatlari bilan ishlash boshqarmasiga:

- jismoniy shaxslar va yuridik shaxslar vakillarining ariza, shikoyat va murojaatlarini ko‘rib chiqishda O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuni talablariga so‘zsiz rioya qilinishini ta'minlash;

- O‘zbekiston Respublikasi Bosh vazirining elektron qabulxonasidan tushayotgan har bir murojaatni amaliy hal etish choralarini ko‘rish hamda ularning ijrosini har kuni tanqidiy muhokama qilib borish;

- yozma (elektron) va og‘zaki murojaatlarning (jumladan, barcha xodimlarning ishga va o‘z lavozim yo‘riqnomasiga bo‘lgan mas'uliyati, mijozlarga ko‘rsatilayotgan bank xizmatlarining sifati, namunaviy loyihalar asosida qurilayotgan uy-joylar, filiallar tomonidan kreditlar ajratish, muddati kelgan omonatlarni mijozlarning birinchi talabiga ko‘ra berilishini ta'minlash, plastik kartochkalardan belgilangan tartibda naqd pul mablag‘larini berish, bank tizimiga oid boshqa masalalar bo‘yicha), shuningdek takroriy murojaatlarning ko‘payishi sabablarini o‘rganib borish, kelgusida ularning kelib chiqishiga sabab bo‘layotgan omillarni bartaraf etish, xat va arizalarni ko‘rib chiqish muddatlarining asossiz uzaytirilishiga yo‘l qo‘ymaslik choralarini ko‘rib borish;

- jismoniy shaxslar va yuridik shaxslarning vakillarini qabul qilish, ularning murojaatlarini qonun talablariga muvofiq ko‘rib chiqilishi ustidan nazorat o‘rnatish;

- murojaatlar ko‘paygan mahalla fuqarolar yig‘inlari va qishloq fuqarolar yig‘inlarida muntazam ravishda uchrashuvlar tashkil etib borish, mazkur uchrashuvlarda jismoniy shaxslar va yuridik shaxslar vakillari tomonidan ko‘tarilgan barcha masalalarni joyida amaldagi qonunchilikka muvofiq ijobiy hal etish;

- kichik biznes sub'yektlariga, tadbirkor ayollarga, xizmat ko‘rsatish va servis sohasiga, oziq-ovqat va nooziq-ovqat tovarlari ishlab chiqarishni kengaytirish va ichki bozorni to‘ldirish maqsadlariga, kasb-hunar kollejlari bitiruvchilariga, oilaviy tadbirkorlikni rivojlantirishga kredit ajratish masalalarida kelib tushayotgan murojaatlarni darhol hal qilish, ularning ro‘yxatini yuritish va bank xodimlarining amaldagi qonunlarga qat'iy rioya qilishlari ustidan nazoratni kuchaytirish vazifalari yuklatildi.

Murojaatlar bilan ishlash holatini izchil takomillashtirib borish, bu borada sansalorlikka yo‘l qo‘ymaslik va murojaatlarning yechimini o‘z vaqtida hal etish ATB “Qishloq qurilish bank” faoliyatining eng muhim yo‘nalishlardan biri bo‘lib qoladi.

Bank Axborot xizmati

Reklama huquqi asosida.

Mavzuga oid
Top