Bir ilovada kartadan kartaga pul oʻtkazish bepul, boshqasida maʼlum limitgacha komissiya olinmaydi, yana birida esa har bir oʻtkazma pulli. Bir xil koʻringan xizmat uchun nega turlicha tarif belgilanadi? Bepul oʻtkazmaning xarajatini kim qoplaydi?
15-oktabr kuni Markaziy bankda moliyaviy xizmatlardagi komissiyalarga bagʻishlangan davra suhbatida banklar va toʻlov tashkilotlari vakillari shu savollarga oʻz biznes modeli nuqtayi nazaridan javob berdi.
“Nol komissiya - xarajat yoʻq degani emas”
Click asoschisi va rahbari Ulugʻbek Rustamovning tushuntirishicha, kartadan kartaga pul oʻtkazishda bir nechta ishtirokchi - bank, protsessing tizimi va toʻlov tashkiloti xizmat koʻrsatadi. Mijoz toʻlaydigan komissiya shu zanjirdagi toʻlovlar hamda xizmatni taʼminlash xarajatlari bilan bogʻliq. Mijoz uchun bepul oʻtkazma taklif qilayotgan tashkilot bu xarajatlarni oʻz zimmasiga oladi.
“Har bitta P2P boʻlganda protsessing tizimi bor, bank bor va toʻlov tashkiloti bor. Bularning hammasining komissiyalari yigʻindisi hozir shu komissiyani tashkil qiladi. Bundan tashqari, koʻp tashkilotlar yoki banklar bu komissiyani oʻz hisobidan qoplab berishi mumkin. Kimdir nol komissiya beryapti degani - bu shunchaki topayotgan foydasidan voz kechyapti degani emas. Koʻplar buni marketing xarajatlari deb hisoblaydi”, - dedi Rustamov.
U banklar bilan toʻlov tashkilotlarining daromad olish imkoniyatlari turlicha ekanini taʼkidladi. Bank mijoz bilan munosabatdan boshqa yoʻnalishlarda ham daromad olishi, shu hisobidan oʻtkazmani bepul qilishi mumkin. Click esa kartadan kartaga oʻtkazmalarda komissiyaga koʻproq bogʻliq ekanini bildirdi.
“Biz toʻlov tashkilotimiz. Toʻlov tashkiloti juda past marjali, juda kichkina komissiyada ishlaydigan kompaniya hisoblanadi. Bizda mana shu komissiyadan boshqa topadigan pulimiz yoʻq. Yaʼni, agar biz kimgadir kredit berganimizda yoki mijozlarning turgan pulini aylantirib, boshqa narsa qilganimizda, balki bu komissiyani [qoplashning] iloji boʻlardi”, - dedi u.
Rustamov banklar mijozlarning kartadagi mablagʻlarini resurs sifatida ishlata olishini bepul oʻtkazmalarni moliyalashtirish imkoniyatlaridan biri sifatida keltirdi. Uning soʻzlariga koʻra, bankning maqsadi faqat bitta oʻtkazmadan daromad olish bilan cheklanmaydi: mijoz uning kartasidan foydalanishi va pulini shu bankda saqlashi ham manfaat keltiradi.
