Hollivudlik mashhur aktyor Harrison Fordning samolyoti yo‘lovchi layneri bilan to‘qnashib ketishiga bir baxya qoldi. Hodisa Kaliforniya shtatida layner qo‘nishga tayyorlanayotganida yuz berdi, deb xabar qilmoqda NBC telekanali.
Ma'lum bo‘lishicha, dushanba kuni yuz bergan voqea paytida aviadispetcherlar Fordga samolyotni Orinj okrugidagi Jon Ueyn nomidagi aeroport uchish-qo‘nish yo‘lagiga qo‘ndirishi lozimligini aytishgan. Biroq aktyor xato tufayli laynerni aylantirib oladigan yo‘lakka qarab parvozni davom ettirgan. Uning samolyoti American Airlines aviakompaniyasining bortida 110 yo‘lovchi bo‘lgan layneri ustidan uchib o‘tib ketgan.
Telekanal ma'lumotiga ko‘ra, yo‘lovchi samolyoti bir necha daqiqa o‘tib omadli ravishda parvoz qilgan.
"Bu layner mening tagimda bo‘lishi kerak edimi?" – deya so‘ragan Ford dispetcherlar bilan suhbatda. Ular aktyorga qo‘nish chog‘ida yo‘l qo‘ygan xatosi haqida xabar berishgan. AQSh fuqarolik aviatsiyasi federal boshqarmasi vakillari aktyorga to‘g‘ri yo‘riqnoma berishganini ma'lum qildi. Ford vakillari esa bu borada hozircha izoh berishmadi.
Ayni damda boshqarma yuz bergan hodisa yuzasidan surishtiruv olib bormoqda, uning yakuniga ko‘ra, Ford parvoz qilishga huquq beruvchi litsenziyadan mahrum etilishi mumkin.
Ma'lumot uchun, bu Harrison Ford boshqaruvidagi samolyot bilan ro‘y bergan birinchi shunday hodisa emas. 2015 yilning martida aktyor tomonidan boshqarilgan yengil motorli samolyot – Ikkinchi jahon urushi davridagi Ryan PT-22 Recruit Kaliforniyadagi Santa-Moniko shahri aeroporti yaqinidagi golf maydoniga qulagandi. Ford hodisadan biroz vaqt avval dvigatel nosozligi haqida xabar bergan. Samolyot qulab tushgandan so‘ng aktyor o‘rta darajadagi bosh jarohatlari bilan kasalxonaga olib ketilgandi.
