Stratolaunch kompaniyasiga tegishli Roc’ning qanotlari qulochi 117 metrni tashkil etadi. Bu hozirgacha qurilgan barcha samolyotlar orasidagi eng katta koʻrsatkichdir. Apparat N351SL raqami bilan roʻyxatdan oʻtkazilgan.
AirNav Radar xizmati maʼlumotlariga koʻra, samolyot 2-oktabr kuni ikkita qisqa parvozni bajargan. Har ikkisi Moxave aerokosmik porti yaqinida oʻtgan. Ikkinchi parvozda Roc aeroport atrofida bir nechta aylana qilgan.
Roc oddiy yuk tashuvchi samolyot sifatida emas, yirik eksperimental apparatlarni belgilangan balandlikka olib chiqib, havodan uchirish platformasi sifatida ishlab chiqilgan. U boshqa foydali yuklarni tashish uchun ham moʻljallangan.
Stratolaunch havodan uchirish flotini kengaytirmoqda
Kompaniya bu vazifalar uchun faqat Roc’dan foydalanish bilan cheklanmayapti. U avval Virgin Orbit’ga tegishli boʻlgan Boeing 747-400 samolyotini ham xarid qilgan.
«Moxave ruhi» - Spirit of Mojave deb nomlangan ushbu samolyot Talon tajriba apparatlarini tashish uchun qayta jihozlangan. Boeing 747 Roc’ga nisbatan koʻproq aeroportlarda ishlay oladi. Bu gipertovushli apparatlar sinovlarini turli joylarda tashkil etish imkoniyatini kengaytiradi.
Sentabr oyida Stratolaunch yana bir yirik samolyot - Boeing 777-200ER xarid qilinganini eʼlon qilgan. Uni ham eksperimental apparatlarni havodan uchirish platformasiga aylantirish rejalashtirilgan.
Boeing 777ʼdan foydalanishni 2027-yilda boshlash kutilmoqda. Kompaniya bahosiga koʻra, bu samolyotning qoʻshilishi parvoz sinovlarini oʻtkazish imkoniyatlarini taxminan 35 foizga oshiradi. Stratolaunch buni gipertovushli texnologiyalarni sinashga talab ortib borayotgani bilan izohlamoqda.
