Oliy Liga qishki uyqudan qaytdi. Bugun Oliy Liga-2017 karvoni yo‘lga chiqadi

3 mart, juma kuni O‘zbekiston chempionatiga start beriladi. Tribuna.Uz 26-marotaba tashkil etilayotgan chempionatning birinchi turi anonsi bilan tanishtirib o‘tadi.

Oliy Liga, 1-tur
MeTALLURG – DINAMO (3 mart, 15:30)
O‘z uyida istalgan raqibni mag‘lubiyatga uchrata olishi mumkin bo‘lgan, «Metallurg» yangi mavsumning birinchi o‘yinini bir yillik tanaffusdan so‘ng ligaga qaytgan «Dinamo»ga qarshi uchrashuvda boshlaydi. 

Ikkala jamoaning o‘yinlarida ham mezbonlarning to‘liq ustunligini ko‘rishimiz mumkin. Ayniqsa «Dinamo» mezbonlik qilgan so‘nggi 10 o‘yinda biror marta mag‘lub bo‘lmagan: 9 g‘alaba, 1 durang. «Dinamo» so‘nggi marta Bekobodda 6 yil muqaddam 9 aprel kuni g‘alaba qozonib qaytgan.

MASh'AL – LOKOMOTIV (3 mart, 16:30) 
Amaldagi chempion bu turni Muborakda boshlaydi. So‘nggi yillarda «temiryo‘lchilar» uchun eng qulay raqiblardan biri bo‘lgan jamoaga qarshi o‘yinda mehmonlar favorit sanalmoqda.

Ikki jamoa o‘rtasidagi so‘nggi 8 uchrashuvning barchasida «Lokomotiv» g‘alaba qozongan. «Mash'al» so‘nggi marta «Lokomotiv»ni 2010 yilning avgustida Toshkentda mag‘lubiyatga uchratgan. Muborakdagi so‘nggi g‘alaba (1:0, 15 may) ham 7 yil oldin qo‘lga kiritilgan. «Mash'al» mezbonlik qilgan so‘nggi to‘rt uchrashuvning barchasida «Lokomotiv»ning qo‘li baland kelgan.

PAXTAKOR – QIZILQUM (3 mart, 17:00, Sport)
O‘tgan mavsumni juda bo‘sh o‘tkazgan «Paxtakor» bir necha yillardan buyon ilk marta sovrinsiz qoldi. OChL yo‘llanmasi qo‘ldan boy berildi. Bu mavsumda endi jamoa o‘tgan yilgi xatolarni takrorlamaslikka harakat qilib ko‘radi. Bu yo‘ldagi birinchi raqib Navoiyning «Qizilqum» jamoasi bo‘ladi. Tarkibni sezilarli ravishda kuchaytirgan navoiyliklarga qarshi o‘yin «Paxtakor» uchun qiyin kechishi kutilmoqda.

Ikki jamoa ishtirokidagi o‘zaro o‘yinlarda «Paxtakor» total ustunlikka ega. So‘nggi 22 uchrashuvning birortasida «Qizilqum» g‘alaba qozona olmagan. «Paxtakor»ning 20ta g‘alabasi va 2 durang. Duranglardan biri ham o‘tgan mavsumda Navoiydagi uchrashuvda qayd qilingan. 22 uchrashuvdagi to‘plar nisbati bo‘yicha ham ahvol dahshatli darajada: 64-8. «Qizilqum» o‘zining eng yirik mag‘ubiyatini (0:11, 2007 yil, noyabr) ham aynan «Paxtakor»dan qabul qilib olgan.

QO‘QON-1912 – NASAF (4 mart, 15:30)
O‘tgan mavsumda Oliy ligada qolish vazifasini uddalagan qo‘qonliklar bu mavsumni jiddiy raqibga qarshi uchrashuv bilan boshlaydi. OChL guruh bosqichi yo‘llanmasini qo‘lga kirita olmagan «Nasaf» endi bor e'tiborini chempionatga qaratishi aniq.

Ikki jamoa so‘nggi 10 yillik tarixda faqat 4 bor to‘qnash kelishdi. 2015 yildan yana yuqori divizionga qaytgan qo‘qonliklar o‘tkazilgan to‘rtta uchrashuvning barchasi «Nasaf»ga imkoniyatni boy berib qo‘ygan.  Jamoa Qarshida (0:3, 0:1) umuman to‘p kirita olmagan bo‘lsa, Qo‘qondagi uchrashuvlarda (1:3, 1:2) hech bo‘lmasa bittadan to‘p kiritishga muvaffaq bo‘lgan.

ShO‘RTAN – NeFTChI (4 mart, 16:00)
Dastlabki turada to‘qnash kelayotgan so‘nggi yillarning eng teng kuchli juftliklardan biri. Chempionatning ilk yillarida «Neftchi» gegemonlik qilib kelgan bo‘lsada, yangi asr boshidan boshlab farg‘onaliklar o‘yinida pasayish boshlandi. Hozirgi jamoaning mavqeni «Sho‘rtan» bilan teng deyish mumkin.

Ikkala jamoaning G‘o‘zorda kechgan so‘nggi 9ta (6 g‘alaba, 2 durang) uchrashuvda «Neftchi faqat bir marotaba g‘alaba qozongan. Mehmondagi so‘nggi g‘alabani farg‘onaliklar 2013 yilda (2:0) qo‘lga kiritishgan. O‘tgan yilgi jamoalarning o‘zaro o‘yinlarida, G‘o‘zorda «Sho‘rtan» g‘alaba (2:1) qozongan bo‘lsa, Farg‘onada kuchlar teng (2:2) kelgan.

NAVBAHOR – OBOD (4 mart, 16:00)
2016 yilgi mavsumda Oliy ligada debyut qilgan «Obod» o‘z oldiga qo‘yilgan eng asosiy vazifani uddaladi. Jamoa ligada jon saqlab qolishga muvaffaq bo‘ldi. Yangi mavsumda endi jamoa o‘z o‘rnini mustahkamlash uchun kurash olib boradi va bu yo‘ldagi birinchi safari Namanganga bo‘ladi.

Ikki jamoaning o‘zaro o‘yinlari tarixi o‘tgan yildan boshlab yozila boshladi. Namanganda «Navbahor» 2:1 hisobida g‘alaba qozongan bo‘lsa, Toshkentda kechgan uchrashuvda «Obod» yirik hisobdagi g‘alabani qo‘lga kiritdi — 3:0.

BUXORO – OLMALIQ (4 mart, 16:30)
O‘tgan yilgi mavsumdan boshlab oldiga jiddiy maqsadlarni qo‘yayotgan «Buxoro» yangi mavsum oldidan matbuotning asosiy diqqat markazidagi jamoa bo‘ldi. Klubni Vadim Abramov boshqarishi mumkinligi haqida xabarlar chiqdi. Oxir-oqibatda jamoa ruliga Ulug‘bek Baqoyev va Baxtiyor Ashurmatov tandemi keldi.

Moliyaviy jihatdan O‘zbekistonning yetakchi jamoalaridan biri bo‘lgan «Buxoro» yangi mavsumda kamida OChL yo‘llanmasi uchun kurash olib bormoqchi va bu yo‘ldagi dastlabki raqib yangilangan «Olmaliq» jamoasi bo‘ladi.

Ikkala jamoa chempionat doirasida jami 16 bor to‘qnash kelishgan. 6 uchrashuvda «Buxoro», 8 uchrashuvda «Olmaliq»ning qo‘li baland kelgan, 2 uchrashuv durang bilan tugagan. Buxoroda o‘tgan so‘nggi 5ta uchrashuvning ikkitasi «Olmaliq» g‘alaba qozongan. O‘tgan mavsumda bo‘lib o‘tgan ikki uchrashuvda ham «Buxoro»ning qo‘li baland keldi.

 BUNYoDKOR – SO‘G‘DIYoNA (4 mart, 18:00, Sport)
Osiyo chempionlar ligasini muvaffaqiyatsiz boshlagan Sergey Lushchan shogirdlari ichki chempionatning dastlabki uchrashuvini «Sug‘diyona»ga qarshi uchrashuv bilan boshlaydi. Chempionlik uchun da'vogarlardan biri sifatida qaralayotgan yoshargan «Bunyodkor» uchun jizzaxliklar eng qulay raqiblardan biri hisoblanadi.

Ikkala jamoa shu kungacha 14 marotaba to‘qnash kelishgan, 13 uchrashuvda «Bunyodkor»ning qo‘li baland kelgan. Faqat 2015 yilga kelibgina «Sug‘diyona» ilk marta toshkentliklarni mag‘lubiyatga (2:1) uchratishga muvaffaq bo‘lgan. Ikkala jamoa o‘rtasidagi to‘qnashuvlardagi umumiy to‘plar nisbati 37-3 ko‘rinishda. Jizzaxliklar Toshkentda ochko olish tugul hatto biror marta to‘p ham kirita olishmagan: 7 o‘yin 7 mag‘lubiyat, to‘plar nisbati — 0:17.