Oʻzbek futbolida yana janjal: «Navbahor» – «Paxtakor» oʻyinida va undan keyin nimalar boʻldi?
|09:112358 min
Superliganing 24-turida «Navbahor» va «Paxtakor» oʻrtasidagi bahs durang bilan yakunlandi, ammo asosiy voqealar final hushtagidan keyin boshlandi. Hakamlik qarorlariga eʼtirozlar, futbolchining golni nishonlashi ortidan ikki klub matbuot xizmatlari oʻrtasidagi tortishuv va chempionlik poygasida yoʻqotilgan muhim ochkolar - Namangandagi oʻyin oʻzbek futbolida navbatdagi mojaroga sabab boʻldi.
«Navbahor» va «Paxtakor» oʻrtasidagi uchrashuvlar doim keskin kurashlarga boy boʻlgan. Bu gal ham shunday boʻldi. Faqat oʻyindan keyin muxlislar maydondagi futboldan koʻra hakamlik qarorlari, ikki klub mediasi oʻrtasidagi dahanaki jang va chempionatdagi adolat masalasini koʻproq muhokama qilishmoqda.
Namangandagi durang va mojaroga sabab boʻlgan gol
Superliganing 24-turidan oʻrin olgan «Navbahor» – «Paxtakor» bahsi har qachongidan ham katta ahamiyatga ega edi. Turnir jadvalida peshqadamlik qilayotgan «sherlar» uchun ochko yoʻqotish chempionlik poygasidagi ustunlikdan mahrum boʻlishni anglatardi. «Navbahor» esa chempionlik uchun kurashga qaytish yoʻlida soʻnggi imkoniyatlaridan birini ishga solishi kerak edi.
Namanganda 20 mingdan ortiq muxlis qarshisida kechgan uchrashuvni «Paxtakor» yaxshiroq boshladi. Birinchi boʻlimda Zayd Tahsinning goli mehmonlarni hisobda oldinga olib chiqdi.
Ikkinchi boʻlimda «Navbahor» hujumlarini kuchaytirdi. Mezbonlar penalti ishlab olishdi, biroq undan foydalana olishmadi. Shunga qaramay, uchrashuv oxirida Muhammadqodir Hamraliyev hisobni tenglashtirdi.
Qizigʻi, Hamraliyev avval «Paxtakor» safida harakat qilgan. U golni sobiq jamoasining zaxira oʻrindigʻi tomon qarab, oʻziga xos tarzda nishonladi. Keyinchalik aynan shu harakat ikki klub oʻrtasidagi tortishuvga sabab boʻldi.
Biroq dastlab janjal gol nishonlanishi emas, hakamlik qarorlari atrofida boshlandi.
«Bizga futbol oʻynashga qoʻyishmadi» - Kamoliddin Tojiyevning eʼtirozi
Uchrashuvdan keyingi matbuot anjumanida «Paxtakor» bosh murabbiyi Kamoliddin Tojiyev hakamlikdan ochiqchasiga norozilik bildirdi.
«Men shu kunga qadar hakamlik masalasida bir ogʻiz ham fikr bildirmadim. Lekin bugun bizga oʻynashga qoʻyishmadi. Darvozamizga belgilangan penaltida futbolchimiz shunchaki raqibning yonida yugurib ketayotgandi. Flamarion esa jarima maydonchasida qoʻlidan tortilib, yiqitildi, ammo penalti berilmadi.
Gapirmayman deyman-u, lekin gapirmasa boʻlmayapti. Sherzod Nasrullayevga hakam “Sen tegmading, lekin yonida xavfli yugurding”, debdi. Agar futbolchiga tegmagan boʻlsa, kontakt boʻlmasa, qanday qilib penalti belgilash mumkin? Toʻgʻrisi, tushunmadim», dedi murabbiy.
Mavzuga oid
Tojiyevning bu bayonoti hakamlik atrofidagi bahslarni yanada kuchaytirdi. Ammo ikki klub oʻrtasidagi ziddiyat shu bilan tugamadi.
Ikki klub mediasi oʻrtasidagi dahanaki jang
Oʻyindan koʻp oʻtmay «Paxtakor» matbuot xizmati Muhammadqodir Hamraliyevning golni nishonlash uslubini tanqid qildi.
Klubning rasmiy sahifasida «Sen bir gol urma ekan», degan mazmundagi yozuv paydo boʻldi. Gol nishonlangan video ostida esa «Eshikni qattiq yopma, futbolchi», degan izoh qoldirildi.
Bu chiqishga «Navbahor» matbuot xizmati ham javob qaytardi. Namangan klubi professional futbolchi oʻz golini istagan uslubda nishonlash huquqiga ega ekanini taʼkidlab, raqib jamoaning rasmiy sahifasida futbolchi shaxsiga nisbatan bunday munosabat bildirilishini savol ostiga oldi.
«Oʻzbekistondagi eng katta klublardan birining rasmiy sahifasida futbolchining shaʼni va qadr-qimmatini yerga urish qanchalar toʻgʻri?» - deyiladi klub bayonotida.
«Navbahor» Hamraliyevni qoʻllab-quvvatlab, unga quyidagicha murojaat qildi:
«Muhammadqodir, sen kechagi urgan goling hamda uni nishonlashing bilan ranjitgan muxlislaringdan yuz baravar koʻproq ishqibozni xursand etding. Zero, stadionda 227 nafar emas, 22 751 nafar tomoshabin bor edi. Senga ularni har bir oʻyinda shunday xursand qilish nasib etsin. Otangga balli, topganing halol boʻlsin».
Shu tariqa maydondagi raqobat ijtimoiy tarmoqlarga koʻchdi. Ikki klubning rasmiy sahifalari orqali bildirilgan munosabatlar muxlislar oʻrtasida ham qizgʻin bahslarga sabab boʻldi.
«Paxtakor» hakamning qarorlarini birma-bir tahlil qildi
«Paxtakor» klubi oʻyindan keyingi eʼtirozlar bilan cheklanib qolmadi. Toshkent klubi matbuot xizmati uchrashuvdagi bahsli vaziyatlar aks etgan maxsus videorolik eʼlon qildi.
Unda bosh hakam Ilgiz Tantashevning bir qator qarorlari tanqid qilingan. Xususan, klub quyidagi holatlar boʻyicha eʼtiroz bildirgan:
«Paxtakor» futbolchilariga uchrashuv boshidan sariq kartochkalar koʻrsatilgani;
Vanya Ilichga nisbatan qizil kartochka qoʻllanmagani;
Toshkent klubi foydasiga ikkita penalti berilmagani.
Klub har bir eʼtiroziga videolavhalarni dalil sifatida keltirgan.
Ilgiz Tantashev yana tanqidlar markazida
Qizigʻi, bu Ilgiz Tantashev ishtirokidagi oʻyindan keyin hakamlikka nisbatan bildirilgan birinchi eʼtiroz emas.
Namangandagi voqealardan bir necha hafta avval Samarqandning «Dinamo» klubi matbuot xizmati ham hakamlik qarorlari yuzasidan videomurojaat bilan chiqqandi. Oʻsha eʼtirozlar markazida ham Tantashev turgan.
Futbol mutaxassisi Alisher Nikimbayevning yozishicha, Superliganing bir nechta klubi rasmiylari oʻzaro uchrashib, chempionatdagi hakamlik muammolarini muhokama qilgan. Ular adolatli yechimga erishish uchun masalani oxirigacha olib borish zarurligi haqida kelishib olgani aytilmoqda.
Biroq bunday uchrashuv va kelishuv haqida klublarning rasmiy tasdigʻi keltirilmagan.
Ilgiz Tantashev esa oʻzbek futbolida ancha yillardan buyon faoliyat yuritib kelayotgan hakamlardan biri. U 2021-yilda Oʻzbekistonning eng yaxshi hakami deb topilgan. Ammo oradan bir necha oy oʻtib, qoʻpol xatolarga yoʻl qoʻygani sababli Oʻzbekiston futbol assotsiatsiyasi tomonidan nomaʼlum muddatga hakamlikdan chetlatilgan.
Endi uning qarorlari yana katta muhokamalarga sabab boʻlmoqda.
Namanganda yoʻqotilgan ikki ochko «Paxtakor»ga qanchaga tushdi?
«Paxtakor»ning Namangandagi durangdan keyin bunchalik keskin munosabat bildirganini tushunish uchun turnir jadvaliga nazar tashlash kifoya.
23-turdan keyin «Paxtakor» «Neftchi»ni safarda magʻlub etgani tufayli oʻzaro oʻyin natijasidagi ustunlik hisobiga chempionat peshqadami boʻlib turgandi.
24-turdan keyin esa «Neftchi» yana birinchi oʻringa qaytdi.
Eng muhimi, 25-turda «Paxtakor» va «Neftchi» Toshkentda oʻzaro kuch sinashishi kerak.
Agar «Paxtakor» Namangan safaridan uch ochko bilan qaytganida, «Neftchi»ga qarshi hal qiluvchi bahsda durang ham jamoani qoniqtirishi mumkin edi.
Endi esa vaziyat boshqacha. Chempionlik poygasida ustunlikka erishish uchun «sherlar»ga «Neftchi» ustidan gʻalaba zarur.
Demak, «Navbahor»ga qarshi bahsda yoʻqotilgan ikki ochko «Paxtakor»ni nafaqat peshqadamlikdan mahrum qildi, balki navbatdagi muhim oʻyin oldidan ham qiyin vaziyatga tushirdi. Toshkent klubi endi koʻproq tavakkal qilishga majbur boʻladi.
Oʻzbek futbolidagi eski muammo yana kun tartibida
«Navbahor» va «Paxtakor» oʻrtasidagi bahs oʻzbek futbolidagi bir nechta muammoni yana yuzaga chiqardi.
Birinchisi - hakamlik qarorlariga ishonch masalasi. VAR tizimi joriy etilganiga qaramay, klublarning hakamlikdan noroziligi kamaygani yoʻq. Aksincha, ayrim uchrashuvlardan keyin eʼtirozlar rasmiy videomurojaatlar darajasiga chiqmoqda.
Ikkinchisi - klublar oʻrtasidagi munosabat va media madaniyati. Raqobat faqat maydonda emas, ijtimoiy tarmoqlarda ham davom etmoqda. Bunda rasmiy klub sahifalarining futbolchilarga nisbatan munosabati ham alohida bahs mavzusiga aylanyapti.
Uchinchisi - chempionlik uchun kurashning keskinlashgani. Mavsumning hal qiluvchi pallasida har bir ochko qimmatga tushmoqda. Bunday vaziyatda hakamning bitta bahsli qarori ham katta mojaroga sabab boʻlishi mumkin.
Ilgiz Tantashev Namanganda haqiqatan ham xatoga yoʻl qoʻydimi yoki klublarning eʼtirozlari chempionlik poygasidagi bosim natijasimi? Bu savolga xolis hakamlik tahlili javob berishi kerak.
Hozircha aniq boʻlgani shuki, «Navbahor» va «Paxtakor» oʻrtasidagi oʻyin tugagan, ammo uning atrofidagi bahslar hali yakunlangani yoʻq.
