Futbol tarixidagi eng mashhur qarama-qarshilik — «El-klasiko», navbatdagi London derbisi. Umuman shanba va yakshanba dam olish kunlari juda qiziqarli futbol uchrashuvlariga boy o‘tishi kutilmoqda. Tribuna.Uz bir yo‘la oltita markaziy uchrashuvlarga to‘xtalib o‘tadi.
«Chelsi» — «Tottenhem» (22 aprel, 21:15, Match! Futbol 1)
Angliyada bu hafta chempionat bilan birga kubok uchrashuvlarning hal qiluvchi bosqichi ham bo‘lib o‘tadi. Tumanli albionning faxri hisoblangan «Uembli»da bo‘lib o‘tadigan yarim final uchrashuvlaridan birida ikki London jamoasi kuch sinashadi. «Chelsi» chorak finalda Joze Mourino boshchiligidagi «MYu»ni mag‘lubiyatga uchratdi.
Endi jamoa «Tottenhem» bilan final yo‘llanmasi uchun kurash olib borishi kerak bo‘ladi. Chempionlik uchun kurash olib borayotgan ikki jamoa kubokning bu bosqichida ham o‘zaro hisob-kitob qilishi yanada qiziqishga sabab bo‘lishi tayin. «Chelsi» «Uembli»da o‘tkaziladigan yarim finallarning eng omadli jamoalaridan biri sanaladi. Jamoa bu yerda o‘tkazgan 6 yarim final uchrashuvining 5tasida g‘alaba qozongan.
Ikki jamoa so‘nggi marta Angliya kubogi doirasida 2012 filda yarim finalda to‘qnash kelishgan va o‘shanda «Uembli»da kechgan uchrashuvda «Chelsi» 5:1 hisobida g‘alaba qozongandi. Umuman olganda «Tottenhem» Angliya kubogi doirasidagi «Chelsi»ga qarshi so‘nggi to‘rtta uchrashuvda g‘alaba qozona olmagan. «Chelsi»
«Borussiya» (Myonxengladbax) — «Borussiya» (Dortmund) (22 aprel, 21:30)
Bundesligada turning eng qiziqarli uchrashuvlaridan biri ikki «Borussiya» jamoalari o‘rtasida kechishi kutilmoqda. Ikki jamoa ham yevrokuboklar uchun kurash olib bormoqda. Myonxengladbax Diter Hekking boshchiligida yana saralanganlar zonasiga qaytdi. Jamoa Yevropa Ligasi zonasiga kirishga yaqin turgan bo‘lsa, Dortmundliklar «Hoffenhaym» bilan qaysi jamoa YeChLga to‘g‘ridan-to‘g‘ri yo‘llanma olishiyu, qaysi jamoa saralash bosqichida ishtirok etishi bo‘yicha kurashmoqda. «Hoffenhaym»ning «Kyoln» uyidagi durangidan so‘ng dortmundliklarda 3-o‘ringa ko‘tarilib olish uchun juda yaxshi imkoniyatga ega bo‘lib turibdi.
Ikki jamoa ham bu uchrashuvdan keyin Germaniya kubogi yarim finalidagi ishtirok etishadi. Myonxengladbaxliklar «Ayntraxt»ga qarshi, Dortmund esa «Bavariya»ga qarshi maydonga tushishi lozim. Shu ma'noda bu uchrashuvda ikkala jamoa ham tarkibda bir qator rotatsiyalarni amalga oshirishi ham mumkin.
Ikki jamoa o‘rtasidagi Myongxengladbaxdagi kechgan so‘nggi olti uchrashuvdan faqat bittasida «Borussiya» g‘alaba qozongan. U ham o‘tgan mavsumdagi uchrashuvda kuzatilgan. Bu uchrashuvgacha «Dortmund» beshta uchrashuvdan iborat g‘alabasiz seriyani o‘tkazgandi.
«Fiorentina» – «Inter» (22 aprel, 23:45, Sport TV, Match! Futbol 2)
Joriy mavsumda «Inter»ning A Seriyadagi eng yaxshi natijasi qatorasiga yetti o‘yinda ovi baroridan kelgani bo‘ldi. Biroq jamoa so‘nggi 6 uchrashuvda bor-yo‘g‘i yetti ochko to‘plashga muvaffaq bo‘lgan. Pioli shogirdlari to‘rt uchrashuvdan buyon g‘alaba qozona olmay kelmoqda. Paulu Souza jamoasi esa ketma-ket duranglar evaziga 8-o‘rinda qolib ketmoqda. Bu uchrashuv jamoaning yevrokuboklar uchun kurashish yo‘lidagi so‘nggi imkoniyati bo‘ladi. Agar jamoa g‘alaba qozona olmasa, Yevropa ligasi yo‘llanmasidan ham butkul umidini uzaverishi mumkin.
Ikki jamoa o‘rtasidagi «Fiorentina»da kechgan so‘nggi 5 uchrashuvning faqat bittasida «Inter» g‘alaba qozongan. Bu voqea bundan 3 yil muqaddam sodir bo‘lgandi. Ammo jamoa 2012 yilga qadar «Fiorentina»da 7 uchrashuvdan iborat mag‘lubiyatsiz seriyani o‘tkazib kelgandi.
Arsenal – Manchester Siti (19:00, Match! Futbol 1)
Angliya Kubogining bu yilgi yarim finalllari o‘ziga xos tarzda bo‘lib o‘tishi kutilmoqda. Chunki yaqin yillarda Premer-ligada kuchli oltilikdagi bir yo‘lla to‘rtta jamoaning bu bosqichga yetib kelishi kuzatilmagandi. Shu ma'noda bu safar «Uembli»da bo‘lib o‘tadigan ikki uchrashuv ham muxlislar orziqib kutadigan bo‘lishi aniq bo‘lib ulgurgandi.
«Arsenal» va «Siti» bu uchrashuvda finaldagi raqibi kim bo‘lishini bilgan holda chiqishadi. Bu jihatdan o‘yinda qanchalik yordam berishi mumkin, oldindan bilish qiyin, biroq bu o‘yin sifatiga buzib qo‘ymasligiga 100 foiz kafolat bor. Ko‘pchilikning fikricha Venger «Arsenal»dagi so‘nggi mavsumini o‘tkazmoqda. Balki Gvardiolaning «Manchester Siti»si Londonda Venger uchun so‘nggi sovrinni yutishi uchun qarshilik qilar? Balki bu Venger uchun klubdagi so‘nggi sovrin bo‘lar. Shu tomondan ham bu uchrashuv ahamiyati yuqori bo‘lib turibdi.
Ikki jamoa Angliya kubogi doirasida faqat uch marta ro‘baro‘ kelgan bo‘lib, so‘nggi ikki uchrashuvda «Arsenal»ning qo‘li baland kelgan. «Manchester Siti» Angliya kubogida so‘nggi marta «Arsenal»ni bundan bir asr ilgari, 1904 yilda mag‘lubiyatga uchratishning uddasidan chiqqan.
«Real» — «Barselona» (23 aprel, 23:45, UzReport)
Dunyo futbolidagi shubhasiz eng ommabop o‘yin. Futbol tarixidagi eng nomdor qarama-qarshilik — Ispaniya chempionatidagi hal qiluvchi bahsga aylanadi. «Barselona» chempionlik uchun so‘nggi umidini saqlab qolishi uchun Madridda g‘alaba qozonishi shart. Hozirda «Barsa» va «Real» o‘rtasidagi ochkolar farqi 3 ochkoni tashqil qilmoqda. Bu farqni yo‘qqa chiqarish orqali Enrike o‘zining so‘nggi chempionlik unvoni uchun kurashish imkoniyatiga ega bo‘lishi mumkin.
«El-klasiko»ning bu safargi uchrashuviga soya solib turgan kichik unsur bu yo‘qotish bo‘lib turibdi. «Barselona» asosiy futbolchisi Neymar xizmatidan foydalana olmaydi. «Real» tarkibida himoyachilar Pepe va Rafael Varan uchrashuvni o‘tkazib yuboradi. Garet Beylning ishtiroki ham so‘roq ostida qolmoqda.
Madridda kechgan so‘nggi 13 ta «El-klasiko»ning faqat 2tasida «Real»ning qo‘li baland kelgan. O‘sha 2009 yildagi mashhur 2:6 hisobidagi mag‘lubiyat bilan boshlangan omadsizliklar seriyasi 2015/2016 yilgi mavsumdagi 0:4 hisobidagi mag‘lubiyat bilan tugagan. Biroq boshqa tomondan «Real» «Kamp Nou»da kechgan so‘nggi ikki «El-klasiko»da mag‘lubiyatga uchramayapti.
Lionel Messi «El-klasiko» tarixidagi eng sermahsul futbolchi sanaladi. U «Real» darvozasiga jami 21ta to‘p kiritgan, 13ta golli uzatmani amalga oshirgan. Shuningdek 2 het-trik ham uning hisobida bor. «Klasiko»da «Real»ning ustunligi sifatida jamoaning joriy mavsumda o‘z uyida yutqazmay kelayotganini ko‘rsatish mumkin. Shuningdek, madridliklar La-ligada 12 turdirki mag‘lubiyat nimaligini bilmaydi.
«Lion» – «Monako» (24 aprelga o‘tar kechasi, 00:15, Match! Futbol 1)
Mavsum avvalida chempionlikka da'vogarlik qilishi kutilgan «sherlar» ayni damda YeChL yo‘llanmasidan ham quruq qolishiga to‘g‘ri keldi. Endilikda Bruno Jyenezio shogirdlari Chempionlar ligasi yo‘llanmasini qo‘lga kiritish uchun faqatgina Yevropa ligasida muvaffaqiyat qozonishi kerak bo‘ladi. O‘tgan haftada jamoa Yevropa ligasi chorak finalida «Beshiktosh»da kechgan o‘ta muhim uchrashuvda penaltilar seriyasiga ko‘ra g‘alaba qozonib, yarim finalda ishtirok etadigan bo‘ldi. «Monako» ham o‘z navbatida «Borussiya»ga qarshi ikkala uchrashuvdagi g‘alabalar evaziga YeChL yarim finalida ishtirok etadigan bo‘ldi. Yevrokuboklarda Fransiya sharafini munosib himoya qilayotgan ikki jamoa o‘rtasidagi chempionat uchrashuvi qiziqarli kechishi shubhasiz.
Ikki jamoa o‘rtasida so‘nggi 6 uchrashuvdan buyon «Monako» g‘alaba qozna olmayati. «Monako» chempionatda yetakchilik qilayotganiga qaramay birinchi davrada o‘z uyida kechgan uchrashuvda «Lion»ga imkoniyatni boy berib qo‘ygandi. «Lion»da kechgan o‘tgan mavsumdagi uchrashuvda «Monako» 1:6 hisobida imkoniyatni boy berib qo‘ygan. Umuman Lionda bo‘lib o‘tgan so‘nggi 12 uchrashuvning faqat bittasida «Monako» g‘alaba qozona olgan.
Shuningdek, bu haftada yana bir qator qiziqarli uchrashuvlar bo‘lib o‘tishi kutilmoqda. Bundesliga kashfiyoti «Leyptsig»ning «Shalke» uyida mehmon bo‘lishi, hissiyotlarga to‘la Istanbul derbisi «Galatasaroy» va «Fenerbahche» to‘qnashuvlari shular jumlasidan. Bir so‘z bilan aytgan hafta uik-endi sizni zeriktirib qo‘ymasligi aniq.
