Ma'lumki, shu kunlarda Toshkent shahri boks bo‘yicha 29-Osiyo chempionatiga mezbonlik qilmoqda. “O‘zbekiston” universal sport majmuasida bo‘lib o‘tayotgan janglar tobora qizg‘in pallasiga kirib kelayapti. Bokschilar saralangani sari bo‘layotgan kuch sinashishlar shiddatli tus olmoqda.
Xususan, O‘zbekiston terma jamoasining 52 kg vazn toifasida ishtirok etayotgan a'zosi Jasurbek Latipov o‘z vazn toifasida Osiyoda birinchi raqamli bo‘lgan qirg‘izistonlik Usenaliyev Ozodga qarshi ringga ko‘tarilib, 2 may kungi kechki bahslarni boshlab berdi.
Jangning uchinchi raunddida qirg‘izistonlik bokschi jarohat olgani sababli, referi shifokorlar bilan maslahatlashgach, o‘yinni to‘xtatishga qaror qildi. Hakamlar qaroriga ko‘ra, tajribali raqibiga qarshi munosib jang olib borgan O‘zbekiston chempioniga g‘oliblikni berishga qaror qilishdi.
