Makedoniya parlamenti binosida 2 may kuni qo‘lbola portlovchi qurilma aniqlangan. Qurilma politsiya tomondan xavfsizlantirilgan. Bu haqda RIA “Novosti” axborot agentligi xabar bermoqda.
"Parlament xavfsizlik xizmati boshlig‘i Goran Yarchevski soat 17.30da politsiyaga 1-qavat yo‘lagida pilikli petarda ko‘rinishidagi qo‘lbola portlovchi qurilma aniqlanganini ma'lum qilgan. Bu qurilma zajigalkalarni gaz bilan to‘ldirish uchun mo‘ljallangan katta gaz balloniga mahkamlangan bo‘lgan", deyilgan xabarda.
Ta'kidlanishicha, portlovchi qurilma aniqlanganda parlament binosi yonidagi ko‘chada namoyish o‘tayotgan bo‘lgan va politsiya kordoni qo‘yilgan. Makedoniya ichki ishlar vazirligida hozircha bu axborotga hech qanday izoh berilmagan.
Eslatib o‘tamiz, 27 aprelda Makedoniyada parlament spikeri etib etnik alban Tal'at Xafariy saylangandan keyin bundan norozi bo‘lganlar parlament binosiga bostirib kirib, muxolifat yetakchisi Zoran Zayevni va yana bir necha deputatni do‘pposlashgan.
