Toshkentda O‘zbekistonning 35 yillik taraqqiyot yo‘li, mamlakatdagi islohotlar va parlament diplomatiyasining yangi vazifalariga bag‘ishlangan xalqaro konferensiya bo‘lib o‘tdi. Unda turli davlatlar parlamentlari vakillari, xalqaro tashkilotlar, diplomatlar, ekspertlar va davlat organlari vakillari ishtirok etdi.
Konferensiyada asosiy e’tibor O‘zbekistonning mustaqillik yillaridagi taraqqiyot tajribasi bilan birga, parlamentlarning xalqaro va mintaqaviy muammolarni hal etishdagi roliga qaratildi. Tadbir yakunida parlamentlararo hamkorlikning ustuvor yo‘nalishlarini belgilab beruvchi Toshkent deklaratsiyasi qabul qilindi.
Parlamentlar uchun yangi vazifalar
“O‘zbekistonning 35 yillik taraqqiyot yo‘li: islohotlar, natijalar va istiqbollar” mavzusidagi konferensiyada konstitutsiyaviy modernizatsiya, parlament nazoratini rivojlantirish, qonunchilikni takomillashtirish, davlat boshqaruvi, barqaror rivojlanish va xalqaro hamkorlik masalalari muhokama markazida bo‘ldi.
Oliy Majlis Qonunchilik palatasi spikeri Nuriddin Ismoilov O‘zbekistonning mustaqillik yillarida amalga oshirgan siyosiy, ijtimoiy va iqtisodiy islohotlariga to‘xtaldi. Uning qayd etishicha, parlamentlarning vazifasi bugun faqat qonun ijodkorligi bilan cheklanib qolmayapti.
“Bugungi kunda parlamentlar faqat qonun ijodkorligi instituti sifatida emas, balki barqaror taraqqiyotni ta’minlash, ijtimoiy-iqtisodiy islohotlarni qo‘llab-quvvatlash va global masalalarga samarali yechim topishda muhim institut sifatida maydonga chiqmoqda”, – dedi Nuriddin Ismoilov.
Spikerning qo‘shimcha qilishicha, konferensiyadagi muhokamalar ham parlament diplomatiyasi mazmuni o‘zgarayotganini ko‘rsatadi. Ya’ni parlamentlararo aloqalar endi rasmiy tashrif va uchrashuvlar bilangina cheklanmasdan, aniq masalalar bo‘yicha hamkorlik mexanizmlarini shakllantirishga xizmat qilishi kutilmoqda.
O‘zbekistonning qo‘shni va qardosh davlatlar parlamentlari bilan aloqalari so‘nggi yillarda kengaygani, do‘stlik guruhlari faoliyati kuchaygani va xalqaro parlament platformalaridagi ishtiroki faollashgani ham konferensiyada qayd etildi.
Markaziy Osiyoda ishonch masalasi
Xorijiy parlament vakillari O‘zbekistonning mintaqaviy hamkorlik va yaxshi qo‘shnichilik siyosatiga yuqori baho berdi. Tojikiston Respublikasi Oliy Majlisi Namoyandagon palatasi Xalqaro ishlar, jamoat birlashmalari va axborot qo‘mitasi raisi Mahmadsho Gulzoda so‘nggi yillarda Markaziy Osiyoda shakllangan yangi siyosiy muhit haqida gapirdi. Uning ta’kidlashicha, O‘zbekistonning ochiq va konstruktiv tashqi siyosati mintaqada o‘zaro ishonch va yaxshi qo‘shnichilik munosabatlarini mustahkamlashga xizmat qilmoqda.
“Aynan ishonch hamkorlikni yuzaga keltiradi. Hamkorlik esa taraqqiyotni ta’minlaydi. Taraqqiyot, o‘z navbatida, tinchlik va farovonlikning mustahkam poydevoriga aylanadi”, – deydi Mahmadsho Gulzoda.
Turkmaniston Mejlisi vakili Merdan Tuvakov esa bugungi murakkab sharoitda davlatlar o‘rtasida to‘g‘ridan-to‘g‘ri muloqotni davom ettirish muhimligini aytdi. U parlamentlararo hamkorlikni ekologik xavfsizlik, transchegaraviy transport-logistika yo‘laklari va raqamli transformatsiya kabi yo‘nalishlarda kuchaytirish zarurligini bildirdi. Shuningdek, yosh parlament a’zolari va ayol qonun chiqaruvchilar uchun muloqot platformalarini kengaytirish taklif qilindi.
Turkiya Buyuk millat majlisi deputati, Turkiya–O‘zbekiston parlamentlararo do‘stlik guruhi hamraisi Usmon Mesten O‘zbekistonning so‘nggi yillardagi taraqqiyotiga yuqori baho berdi. U O‘zbekiston va Turkiya o‘rtasidagi tarixiy va madaniy aloqalar bugungi kunda strategik sheriklik doirasida rivojlanayotganini ta’kidladi. Mestenning fikricha, mintaqa va dunyoda kechayotgan jarayonlar parlamentlar oldiga yangi vazifalarni qo‘ymoqda. Xususan, parlament diplomatiyasini aniq maqsad va natijalarga yo‘naltirish zarur.
“Samarali va maqsadga yo‘naltirilgan parlament diplomatiyasini olib borish, yangi yondashuvlarni ishlab chiqish va aniq natijalar yaratish bugungi parlamentlar oldidagi muhim vazifalardan biridir”, – dedi u.
Qirg‘iziston Jo‘qorg‘u Kengeshi deputati S.A. Amanova esa O‘zbekistonning 35 yillik mustaqillik davridagi taraqqiyot yo‘lini yuqori baholadi. U O‘zbekiston va Qirg‘iziston o‘rtasidagi munosabatlar so‘nggi yillarda sifat jihatidan yangi bosqichga, ittifoqchilik darajasiga ko‘tarilganini qayd etdi.
Deputat parlamentlararo aloqalarni yanada rivojlantirish, ta’lim, ilm-fan, innovatsiya va raqamlashtirish sohalarida hamkorlikni kengaytirish muhimligini ta’kidladi.
Toshkent deklaratsiyasi nimani nazarda tutadi
Konferensiyaning yakuniy qismida uchta tematik seksiya faoliyati sarhisob qilindi. Muhokamalarda madaniy-gumanitar, savdo-iqtisodiy, transport-kommunikatsiya va ekologik yo‘nalishlarda hamkorlikni kengaytirish masalalari ko‘rib chiqildi. Xususan, xalqaro savdodagi tarif va notarif to‘siqlarni kamaytirish, bojxona jarayonlarini soddalashtirish, texnik standartlarni uyg‘unlashtirish, transport-logistika aloqalarini rivojlantirish va raqamli bog‘liqlikni kuchaytirish ustuvor yo‘nalishlar sifatida belgilandi.
Muhokamalar yakunida Toshkent deklaratsiyasi konferensiya ishtirokchilari tomonidan ma’qullanib, parlamentlararo hamkorlikni yanada rivojlantirish uchun asos sifatida qabul qilindi. Shu tariqa, konferensiyada bildirilgan fikrlarni birlashtirgan asosiy g‘oya davlatlar va xalqlar o‘rtasidagi ishonchni mustahkamlash, ochiq muloqotni davom ettirish va umumiy muammolarga birgalikda yechim izlash bo‘ldi.
