Xalqaro anjuman Oʻzbekiston Oliy Majlisi Senati va Parlamentlararo ittifoq hamkorligida tashkil etiladi.
Mazkur konferensiyani Oʻzbekistonda oʻtkazish tashabbusi 2025-yil 5–9-aprel kunlari Toshkentda boʻlib oʻtgan Parlamentlararo ittifoqning 150-Assambleyasida ilgari surilgan.
Konferensiya «Murakkab davrda inson huquqlari, adolat va inson qadr-qimmatini tiklash yoʻlida» mavzusiga bagʻishlanadi.
Tadbir ishtirokchilari orasida yosh parlament aʼzolari, parlament rahbarlari va deputatlar, xalqaro tashkilotlar hamda fuqarolik jamiyati institutlari vakillari boʻladi.
Konferensiya davomida zamonaviy dunyodagi dolzarb muammolarni hal etishda yoshlarning oʻrni va ularning qaror qabul qilish jarayonlaridagi ishtirokini kengaytirish masalalari muhokama qilinadi.
Shuningdek, inson huquqlari va qadr-qimmatini taʼminlash, adolat tamoyillarini mustahkamlash, tinchlik va barqarorlikni taʼminlash hamda Barqaror rivojlanish maqsadlariga erishishda yoshlarning rolini oshirish boʻyicha fikr va tajriba almashiladi.
Anjuman doirasida Barqaror rivojlanish maqsadlariga erishishda parlamentlararo hamkorlik masalalariga bagʻishlangan III global forum ham oʻtkaziladi.
