Rossiya O‘zbekistonga test rejimida faqatgina 30 ming tonna neft yetkazib beradi

Rossiya O‘zbekistonga yaqin orada neft yetkazib berishni boshlaydi, biroq uglevodorod xomashyosi hajmi hozircha cheklangan bo‘ladi, deb xabar berdi neftegaz.ru. 

2017 yilda Rossiya O‘zbekiston bilan erishilgan kelishuvlar doirasida xom neftni yetkazib berishni boshlaydi. Avvaliga gap 500 ming tonna neft haqida borgandi. Biroq joriy yilda bu hajm atigi 30 ming tonnani tashkil etishi mumkin.

Ma'lumki, O‘zbekistonga neft test rejimida yetkazib beriladi, deya ta'kidlaydi nashr.

Neftni yetkazib berishning aniq va qat'iy jadvali hozircha yo‘q.

O‘zbekistonga neft Omsk-Pavlodar-Chimkent magistral neftquvuri orqali yetkazib berilishi mo‘ljallangan.

Avvalroq RF energetika vaziri A.Novak va Qozog‘iston energetika vaziri K.Bozumbayev Rossiya neftini Qozog‘iston orqali O‘zbekistonga yetkazib berish haqida kelishib olishgandi.

Biroq O‘zbekiston yaqin kelajakda Qozog‘iston bilan chegaragacha magistral neftquvurini qurish niyatida. Bu joriy yilda Jizzax viloyatida qurilishi boshlangan neftni qayta ishlovchi yangi zavodni xomashyo bilan ta'minlash maqsadida qilinadi.

Neftquvurining uzunligi 95 km bo‘ladi. Taxminlarga ko‘ra, u Omsk-Pavlodar-Chimkent neftquvuri bilan bog‘lanadi.