Bangladeshda kuchli yomg‘irlar tufayli 30 dan ortiq inson halok bo‘ldi

Bangladesh janubi-sharqida dushanba kuni kuchli yomg‘irlar kuzatildi, noqulay ob-havo sabab 35 kishi halok bo‘ldi, ko‘plar ko‘chki tufayli qurbon bo‘lishgan, deb xabar bermoqda Frans Press agentligi mahalliy hukumatga asosan.

Kuchli yomg‘irdan mamlakatning Rangamati va Bandarban okruglari eng ko‘p zarar ko‘rdi. Jabr ko‘rgan tumanlarda telefon aloqasi ishlamayapti, transport harakati buzilgan. Politsiya ma'lumotlariga ko‘ra, Rangamati tumanida to‘rt harbiy xizmatchi halok bo‘ldi.

Bangladesh favqulodda vaziyatlar bo‘yicha boshqarmasi vakili Reaz Ahmedning ma'lum qilishicha, qutqaruvchilar noqulay ob-havo sabab zarar ko‘rgan, borish qiyin bo‘lgan tumanlarga qarab yo‘l olishgan.

Ushbu davlatda musson davri iyun-sentabr oylarida kuzatiladi. Shu bilan birga, kuchli yomg‘irlar sabab ro‘y beruvchi ko‘chkilar ko‘plab insonlarning hayot bilan vidolashishiga sabab bo‘ladi.