Juma va shanba kuni Oʻzbekiston hududining katta qismida quruq va iliq ob-havo boʻlishi kutilmoqda. Havo harorati asosan kunduz kunlari +25…+30 daraja, baʼzi joylarda +32 darajagacha, kechalari +13…+18 daraja boʻladi, deya xabar bermoqda Oʻzgidromet.
Respublikaning shimoli-gʻarbiy hududlariga Kaspiy dengizidan sovuq va nam havo massalari kirib kelishi boshlanadi. Qoraqalpogʻistonda 2–3-oktabr kunlari, Xorazm viloyatida va Navoiy viloyati shimolida 3-oktabrda baʼzi joylarda yomgʻir yogʻadi.
4-oktabr, yakshanba kuni sovuq va nam havo massalari respublikaning barcha hududlariga tarqaladi. Oʻzbekistonning aksariyat viloyatlarida yomgʻir yogʻadi, baʼzi joylarda kuchli boʻladi. Baland togʻli hududlarda yomgʻir qorga aylanishi mumkin. Fargʻona vodiysida 4-oktabrda kechga tomon yomgʻir yogʻishi kutilmoqda, Surxondaryo viloyatida esa yomgʻir yogʻishi ehtimoli kam.
Shimoli-gʻarbiy hududlarda kunduzgi havo harorati +12…+17 darajagacha pasayadi, respublikaning qolgan hududlarida esa +20…+25 darajagacha boʻlishi kuzatilib, keyinchalik kunning ikkinchi yarmida harorat pasayishi boshlanadi.
3–4-oktabr kunlari respublika boʻyicha baʼzi joylarda shamol tezligi 13–18 metr/soniyagacha kuchayishi kutilmoqda, ayrim joylarda baʼzida chang-toʻzonlar bilan 20–22 metr/soniyagacha kuchayishi mumkin.
Respublikaning togʻoldi va togʻli hududlarida sel-suv toshqin hodisalari yuzaga kelishi mumkin.
Toshkent shahrida shanba va juma kuni yogʻingarchilik kutilmaydi. Harorat juma kunduzi +25…+27 daraja, shanbada +29…+31 daraja boʻladi. Shamol sharqdan 3–8 metr/soniya tezlikda esadi.
4-oktabrda vaqti-vaqti bilan yomgʻir yogʻadi. Sharqiy shamol yoʻnalishini oʻzgartirib, gʻarbdan 3–8 metr/soniya tezlikda esadi, 10–14 metr/soniyagacha kuchayadi, chang-toʻzonlar bilan kuzatilishi mumkin. Harorat kechasi +18…+20 daraja, kunduzi +22…+24 daraja boʻladi, kunning ikkinchi yarmida +17…+19 darajagacha pasayadi.
