Yengil atletika bo‘yicha paralimpiyachilar Londondagi jahon chempionatida ishtirok etishadi

Bugun O‘zbekiston paralimpiyachilari London-2017 Jahon Chempionatiga yo‘l oldilar. Buyuk Britaniya poytaxti London shahrida yengil atletika bo‘yicha chempionat 14-23 iyul kunlari bo‘lib o‘tadi.

Chempionatda 10 kun davomida 1300ga yaqin sportchilar 213ta medalli o‘rinlar uchun kuch sinashadilar. Shular orasida O‘zbekistondan 7 nafar sportchi bor.

Erkaklar o‘rtasida yengil atletikaning disk va yadro uloqtirish turlari bo‘yicha kechadigan bellashuvda Rio-2016 Paralimpiya o‘yinlari rekordchisi va oltin medal sohibi Husniddin Norbekov, nayza otish turi bo‘yicha Rio-2016 Paralimpiya o‘yinlari hamda Baku-2017 Islom birdamlik o‘yinlari rekordchisi va oltin medallari sohibi Aleksandr Svechnikov, 100 va 200 metrga yugurish bo‘yicha Rio-2016 Paralimpiya o‘yinlari bronza medali sohibi Abdurashidov Mansur, 400 va 1500 metrga yugurish bo‘yicha Incheon-2014 Paraosiyo o‘yinlari 2ta oltin medali sohibi Ma'rufjon Murodullayev hamda uzunlikka sakrash turi bo‘yicha Rio-2016 Paralimpiya o‘yinlari bronza medali va Baku-2017 Islom birdamlik o‘yinlari oltin medallari sohibi Doniyor Soliyevlar kuch sinashadi.

Ayollar o‘rtasida kechadigan bellashuvda o‘zbekistonliklardan yadro uloqtirish bo‘yicha Rio-2016 Paralimpiya o‘yinlari kumush medali sohibasi Sofiya Burxanova hamda nayza otish bo‘yicha Rio-2016 Paralimpiya o‘yinlari rekordchisi va oltin medal sohibasi Nozimaxon Qayumovalar sovrinli o‘rinlar uchun kuch sinashadi.