Meksikada odam savdosi bilan shug‘ullanuvchilar tashlab ketgan 150 ga yaqin kishi qutqarildi

Meksika hukumatining ma'lum qilishicha, markaziy amerikalik 147 kishi Verakruz shtatidagi sahroda qoldirib ketilgan. Xabarlarga ko‘ra, ularni noqonuniy odam tashish bilan shug‘ullanuvchilar AQShga borishda transport vositasi buzilib qolgani sababli yarim yo‘lda qoldirib ketishgan. 

Muhojirlarning 74 nafari Honduras, 59 kishi Gvatemala, 13 kishi Salvador fuqarolari ekani aytilmoqda. Yana bir kishi nikaragualikdir. Ular tor tirkamada AQSh bilan chegaradosh Tamaulipas shtatiga ketayotgan bo‘lgan. Ular ushbu shtatdan, Meksika milliy immigratsiya instituti taxminiga ko‘ra, AQShga o‘tkazilishi kerak bo‘lgan. 

Qutqarilganlar orasida 48 nafar o‘smir bo‘lib, shulardan 14 nafari kattalar qarovida bo‘lmagan. 

Ular Verakruz shtati Ozuluama shahri yaqinidagi yo‘l yoqasida qoldirib ketilgan, deb xabar qilmoqda Reuters.