Ijtimoiy ahamiyatga ega dorilar ehtiyojga binoan ajratiladi

Vazirlar Mahkamasining «Ijtimoiy ahamiyatga ega dori-darmonlar va tibbiyot buyumlariga ehtiyojlarni aniqlash tartibi to‘g‘risidagi nizomni tasdiqlash to‘g‘risida»gi qarori loyihasi QHTBT portalida joylashtirildi, deb yozmoqda Norma.uz.

Ijtimoiy ahamiyatga ega vositalar ro‘yxatini Sog‘liqni saqlash vazirligining doimiy faoliyat yuritadigan  komissiyasi tuzadi.

Ro‘yxatga ijtimoiy ahamiyatga ega va atrofdagilar uchun xavf tug‘diradigan kasalliklarni davolashga mo‘ljallangan  dorilar kiritilgan.

Dori vositalari iste'mol tahlilida quyidagi turlarga ajratiladi:

•  iste'moli me'yorlashtiriladigan dorilar;
•  o‘ziga xos ta'sirga ega dorilar;
•  ta'siri keng bo‘lgan dorilar.

Kelgusi yil uchun ijtimoiy ahamiyatga ega bo‘lgan dorilar va tibbiyot buyumlariga ehtiyojni aniqlashda tashxislash va davolash standartlari, klinik yo‘riqnomalar hamda aholining soni va kasallanish statistikasidan foydalaniladi.

Ijtimoiy-ahamiyatga ega dorilarning tasdiqlangan ro‘yxati quyidagilarni aks ettiradi:

•  xalqaro patentlanmagan nomi;
•  dori shakli, dozasi, ishlab chiqaruvchisi, so‘mdagi narxi (QQSsiz) ko‘rsatilgan savdo belgilari.

Dorilarga bo‘lgan yig‘ma ehtiyojni davolash-profilaktika muassasalari aniqlaydi. Aniqlangan ehtiyoj bo‘yicha ma'lumotlar Qoraqalpog‘iston Respublikasi sog‘liqni saqlash vazirligi, viloyat sog‘liqni saqlash boshqarmalari va Toshkent shahar sog‘liqni saqlash bosh boshqarmasiga solishtirma arizani tayyorlash uchun topshiriladi.

Loyiha o‘zgartirilishi, qo‘shimchalar kiritilishi yoki rad etilishi mumkin.