«Tottenhem» bosh murabbiyi Maurisio Pochettino Dortmundning «Borussiya» klubiga qarshi uchrashuv oldidan nima sababdan ingliz klublari YeChLda muvaffaqiyatli o‘ynay olmasligi haqida gapirib o‘tdi.
«Premer-liga – ingliz klubida to‘p suradigan istalgan futbolchi va jamoa uchun eng muhim turnir sanaladi. Italiyada esa barchasi boshqacha – u yerda hamma YeChLni eng muhim musobaqa deb bilishadi. Angliyada esa bu – mamlakat kubogi va chempionligi.
Albatta, Yevropa Ligasi va Chempionlar ligasi ham biz uchun muhim musobaqalardan sanaladi, ammo ular APL darajasidagi turnir sifatida ko‘rilmaydi. Buni tushuntirish mushkul. Meni so‘zlarimni tushunishingiz uchun Angliyada ishlashingiz kerak bo‘ladi.
Yuqorida aytganimdek, Italiyada asosiy e'tiborni YeChLga qaratishadi. Xuddi shu narsa Ispaniyada ham bor. Bu mamlakat jamoalari birinchi navbatga milliy chempionatni emas, Chempionlar ligasini qo‘yishadi. Darajasi pastroq jamoalar esa Yevropa Ligasini yutishni istaydi. Ammo bizning pozitsiyamizni tushunish qiyin emas – premer-liga – dunyodagi eng qiyin chempionat.
Rojdestvo paytida Germaniya, Ispaniya, shuningdek Italiya ham ta'tilga chiqadi va shu sababdan ham Chempionlar ligasida muvaffaqiyatli qatnashadi. Ammo bizda barchasini o‘zgartirish uchun imkoniyat mavjud. Buning uchun yaxshilab o‘ylab ko‘rishimiz talab etiladi. Biz ham YeChLda boshqa jamoalar bilan raqobat qila olishimiz mumkin», – deya Pochettinoning so‘zlarini keltiradi Sky Sports.
