Burjanadze: MRBda Rossiyadagi JChga Saakashvili orqali xalaqit berish rejasi bor

Gruziya parlamenti sobiq raisi Nino Burjanadze mamlakat sobiq prezidenti Mixail Saakashvilining faoliyati Rossiyaga xavf tug‘dirishi haqida aytib o‘tdi.

«Saakashvili MRB tomonidan nazorat qilinuvchi jiddiy loyihaning bir qismidir. Loyihadan maqsad – Rossiyada 2018 yilda jiddiy muammolar keltirib chiqarish. Shu yili mamlakatda ikkita yirik voqea ro‘y beradi.

Ko‘plar Rossiyadan futbol bo‘yicha jahon chempionatini olib qo‘yish hamda mamlakat prezidentligi uchun saylovlarga ta'sir ko‘rsatish istagida. Bu kuchlar Rossiyada Ukraina, Moldova, ehtimol, Gruziyada og‘ir muammolar yuzaga kelishini xohlaydi. Saakashvili – bunday rejani amalga oshirish uchun ajoyib nomzod», - deya Burjanadzening so‘zlarini keltiradi «Nezavisimaya gazeta».

«O‘ylashimcha, Saakashvilining o‘zi oxirigacha borishi kerakligini yaxshi tushunadi. U o‘zini jahonning barcha telekanallarida bo‘lmasa ham, Rossiyada ko‘rsatishlariga erisha oldi. Maslahat berish huquqiga ega emasman, biroq fikrimcha, bu noto‘g‘ri – shunday yondashuv uning mashhurligini faqatgina oshiradi, o‘zi esa Putin, Rossiyaga qarshi ishlaydi. Piar-faollik unga yordam bermoqda», - deya qo‘shimcha qilib o‘tdi Gruziya parlamenti sobiq raisi.

Eslatib o‘tamiz, Rossiyada futbol bo‘yicha jahon chempionati 2018 yilning 14 iyun-15 iyul kunlari 11 shaharda bo‘lib o‘tadi.

Avgust oyining boshlarida Nino Burjanadze 2008 yildagi urushni Saakashvili boshlagani haqida ma'lum qilgandi.