Poytaxt aeroportida Turkiyadan soxta 20 ming dollarni olib kirishga uringan ayol fosh qilindi

Islom Karimov nomidagi Toshkent xalqaro aeroportida Istanbuldan uchib kelgan fuqaro E.A.ning yo‘l sumkasi bojxonachilar tomonidan belgilangan tartibda ko‘zdan kechirilganda, sumkadagi oyoq kiyimlari orasiga 20 ming AQSh dollari yashirib joylashtirilganligi aniqlandi. Bu haqda “Toshkent-Aero” IBK axborot xizmati xabar bergan.

Yo‘lovchi bojxona deklaratsiyasida va bojxona xodimlarining og‘zaki so‘rovi paytida ma'lum qilinmagan, bojxona nazoratidan yashirincha olib o‘tishga urinilgan ushbu valyutalarni sinchiklab ko‘zdan kechirish davomida bojxona xodimlarini shubhalantirgan yana bir jihat fosh bo‘ldi.

Gap shundaki, bir qarashda haqiqiydek tuyulsa-da, ushbu kupyuralarning barchasi qalbaki bo‘lib chiqdi. Buni qalbaki kupyuralarni aniqlashga ixtisoslashgan valyuta detektori ham tasdiqladi.

O‘zbekiston Respublikasi Ichki ishlar vazirligi Ekspert-kriminalistika bosh markazining xulosasiga ko‘ra, ushbu kupyuralarda to‘rsimon strukturalar va himoya lentalari mavjud emas, pullar maxsus korxonalarda tayyorlanmagan, aksincha oddiy elektrofotografik va yassi bosma usulda chop etilgan ekan. Shuningdek, kupyuralardagi ranglar bir-biridan yaqqol farq qiladi.

Surishtiruvlar davomida E.A. ushbu pullarni Istanbuldagi notanish shaxslarning iltimosiga binoan olib kelayotganligini ta'kidlagan. 

Hozirda mazkur holat yuzasidan ushbu shaxsga nisbatan O‘zbekiston Respublikasi Jinoyat kodeksining 176-moddasi 3 qismi “a” bandiga muvofiq jinoyat ishi qo‘zg‘atildi.

Ushbu moddaga binoan qalbaki chet el valyutasini juda ko‘p miqdorda o‘tkazish o‘n yildan o‘n besh yilgacha ozodlikdan mahrum qilish bilan jazolanadi.

Ma'lumot uchun: O‘zbekiston Respublikasi Bojxona kodeksining 240-moddasiga muvofiq jismoniy shaxslar tomonidan bojxona chegarasini kesib o‘tayotganda naqd milliy va naqd chet el valyutasining olib o‘tilishi ustidan nazorat bevosita bojxona organlari tomonidan amalga oshiriladi.