Qirg‘iziston iqtisodiyot vaziri Qozog‘iston bilan chegaradagi murakkab vaziyatga izoh berdi

Qirg‘iziston iqtisodiyot vaziri Artyom Novikov Qozog‘iston bilan chegaradan o‘tishning murakkablashganini "savdoni yashirincha cheklash" deb atadi. Uning aytishicha, vazirlik chegaradagi muammoni hal qilishda yordam so‘rab Yevropa iqtisodiy komissiyasiga Qozog‘iston ustidan arznoma bergan. 

Novikov 27 oktabrdagi matbuot-anjumanda Qirg‘iziston-Qozog‘iston chegarasi orqali tovarlar to‘siqlarsiz o‘tishi masalasi qachon hal bo‘lishini bilmasligini aytdi. 

"Biz bunday vaziyatga birinchi marta duch kelmoqdamiz. Bu yerda "savdoni yashirincha cheklash" atamasini qo‘llash o‘rinlidir", deb aytdi vazir.

Novikov Yevropa iqtisodiy komissiyasi Qirg‘iziston arznomasini ko‘rib chiqish sanasini hali belgilamaganini qo‘shimcha qilgan.

"Vaziyat tartibga solinishiga umid qilamiz. Agar muammo hal qilinmasa, unda Yevrosiyo iqtisodiy ittifoqidan chiqish masalasi siyosiy darajada qabul qilinadi", deb aytgan Novikov. 

Vazirning aytishicha, yuk tashuvchilar chegaradagi vaziyat sababli katta ziyon ko‘rmoqdalar. 

Ikki davlat chegarasidagi vaziyat Qirg‘iziston prezidenti Almazbek Atamboyev 7 oktabrda o‘qituvchilar oldidagi nutqida Qozog‘iston hukumatini "Qirg‘iziston boyliklarini talashda" ayblagandan keyin murakkablashgan.

Shundan keyin qozog‘istonlik chegarachilar 10 oktabrda fuqarolarning chegara orqali o‘tishi rejimini kuchaytirishgan, buning oqibatida nazorat-o‘tkazish punktlarida navbatlar va tirbandliklar yuzaga kela boshlagan.

Bunday vaziyat ikki davlat hukumatlari chegaradan odamlar va mashinalarni o‘tkazishni yengillashtirish haqida kelishib olmagunlariga qadar 18 oktabrgacha saqlanib qolgan. 

Hozir esa asosiy muammo qozog‘istonlik chegarachilar tomondan yuk mashinalari o‘tkazilishi tezligi pastligi bo‘lmoqda.