MDH mamlakatlari IIV tezkor-qidiruv ishlari bo‘yicha yagona tartibni ishlab chiqadi

O‘zbekiston Respublikasi Ichki ishlar vazirligi delegatsiyasi Dushanbe shahrida o‘tkazilgan, nazorat ostida yetkazib berish usulida tezkor-qidiruv ishlarini olib borishning yagona tartibini belgilovchi hujjatni tayyorlash bo‘yicha MDHga a'zo davlatlar Ichki ishlar/politsiya vazirliklari ekspertlari yig‘ilishida ishtirok etdi. Bu haqda O‘zbekiston IIVning Xalqaro hamkorlik boshqarmasi xabar bermoqda.

Yig‘ilishda Armaniston Respublikasi, Belarus, Qozog‘iston, Qirg‘iziston, Rossiya Federatsiyasi, Tojikiston Respublikasi, O‘zbekiston Respublikasi IIV/politsiyasi, MDHga a'zo davlatlar hududida uyushgan jinoyatchilik va xavfli jinoyat turlari bilan kurashni muvofiqlashtirish bo‘yicha Byuro ekspertlari ishtirok etdilar.

Yig‘ilish davomida mutaxassislar tezkor-qidiruv ishlarini olib borish, mavjud muammolarni bartaraf etish, ichki ishlar organlari harakatlarini muvofiqlashtirish va o‘zaro manfaatdorlikning boshqa yo‘nalishlari bo‘yicha o‘z pozitsiyalarini bayon qildilar.