VimpelCom sobiq bosh direktoriga nisbatan O‘zbekistondagi korrupsiya bo‘yicha tergov yopildi

Norvegiya politsiyasi hozirda Veon deb ataluvchi VimpelCom shirkatining sobiq rahbariga nisbatan korrupsiya bo‘yicha tergovni yopdi hamda u endi gumonlanuvchi emasligi haqida ma'lum qildi, deya xabar bermoqda Reuters.

VimpelCom’ning O‘zbekistondagi amaliyotlari bo‘yicha tergov doirasida, 2015 yilda o‘zining aybsizligini da'vo qilgan Jo Lunder politsiya tomonidan biroz muddatga qo‘lga olingandi, hamda o‘shandan beri unga nisbatan surishtiruv olib borilgan.

Hibsga olinganidan keyin, Lunder Fredriksen Group kompaniyasining ijrochi direktori lavozimidan bo‘shadi. Ushbu kompaniya magnat Jon Fredriksenning kemasozlik, neft xizmatlari, baliqchilik va boshqa sohalardagi aktivlarini nazorat qiladi.

«Ish to‘xtatildi», - deyiladi politsiya bayonotida.

Lunderning aytishicha, tergov tufayli tushkunlikka tushib qolgan. «Shunchaki bo‘shliq qoldi... Men 30 yil o‘z nomimni yaratish ustida ishladim, endi esa hammasi kuyib kulga aylandi», - dedi Lunder matbuot anjumanida.

VimpelCom sobiq direktori advokatining aytishicha, Lunder politsiyani yetkazilgan zarar uchun sudga bermoqchi. «Men boshqa bir gumonlanuvchi Lunder kabi juda katta iqtisodiy zararga duchor bo‘lgan bironta ham moliyaviy jinoyatni tergov qilish bo‘yicha misolni keltira olmayman. Biz hozircha uning hajmini ham baholamadik, biroq u juda katta», - degan advokat Kato Shiyotts bo‘lajak da'vo haqida.

AQSh va Niderlandiya hukumati 2014 yilda O‘zbekiston telekommunikatsiya bozoridagi korrupsiya haqida ma'lumotni surishtiruvdan o‘tkazishni boshladi. RBK’ning yozishicha, ularning gumonlari MTS, VimpelSom va TeliaSonera «mahalliy amaldorga» pora berishiga aloqador bo‘lgan. AQSh Adliya vazirligi esa VimpelSom va O‘zbekiston tuzilmalari o‘rtasida 2006 yilning yanvaridan 2011 yilning sentabriga qadar 133,5 mln. dollarlik yettita shubhali kelishuv haqida ma'lumotlarni topdi.

Lunder 2015 yilda korrupsiyaga aloqasi yo‘q ekanini ma'lum qilgan. «Men o‘zim bilgan hamma narsani Norvegiya rasmiylariga aytib berdim», - deya ta'kidlab o‘tgan u.

Kelasi yilning fevralida esa VimpelCom’da pora berish faktini tan olishdi hamda Hollandiya prokuraturasi va AQSh hukumati bilan ishni hal qilish bo‘yicha kelishuvga erishishdi, unga ko‘ra VimpelCom 795 mln. dollar miqdorida tovon pullarini to‘lab berdi.