Norvegiya hukumati jamoat joylarida, jumladan, xiyobonlar, sohillar, maktablar, bolalar bogʻchalari va shifoxonalarda oʻrnatilgan sunʼiy intellektga ega koʻzoynakni taqib yurishni vaqtincha taqiqlashni rejalashtirmoqda.
FT nashrining yozishicha, hukumat 5-oktabr kuni tegishli qonun loyihasi ishlab chiqilayotganini eʼlon qilgan. Yaqin kunlarda u parlamentga kiritilishi rejalashtirilmoqda.
«Odamlar bexabar suratga olinishi, videoga tushirilishi yoki ovozi yozib olinishi xavfini tugʻdiruvchi yangi qudratli texnologiyaning joriy etilishi xavotir uygʻotmoqda», - dedi Norvegiya raqamlashtirish va davlat boshqaruvi vaziri Torgeyr Mikaelsen.
Uning soʻzlariga koʻra, vaqtinchalik taqiq vaziyatni chuqur tahlil qilish hamda doimiy qoidalarni ishlab chiqish uchun zarur.
Norvegiya hukumati sunʼiy intellektli koʻzoynakni toʻliq taqiqlash haqida gap ketmayotganini taʼkidladi.
FT qayd etishicha, Norvegiya sunʼiy intellektli koʻzoynakdan foydalanish boʻyicha cheklovlarni butun mamlakat miqyosida joriy etishga qaror qilgan dunyodagi birinchi yirik davlat hisoblanadi.
Boshqa darajalarda Norvegiyada bunday qurilmalardan foydalanish allaqachon taqiqlangan, masalan, Oslodagi maktablarda hamda Equinor neft-gaz korporatsiyasi obyektlarida. Taqiqlar boshqa davlatlarda ham joriy etilgan. Xususan, Meta kompaniyasining sunʼiy intellektli koʻzoynaklarida Angliya va Uels sudlariga kirish taqiqlangan.
