Texasdagi ommaviy qotillik ijrochisi o‘z joniga qasd qilgani tasdiqlandi

Texasning Sazerlend-Springs shaharchasidagi cherkovda ommaviy qotillik sodir etgan Devin Kelli o‘z joniga qasd qilgan. Bu haqda 6 noyabrdagi matbuot anjumanda Texas shtati jamoat xavfsizligi departamenti vakili Friman Martin ma'lum qildi. 

Martinning aytishicha, Kelli jinoyat joyi yaqinida o‘z avtomobilida o‘lik holda topilgan.

Politsiya vakillarining ma'lum qilishicha, qotil cherkovdagi otishma vaqtida 15 ta o‘qdonni bo‘shatgan. Otishmadan keyin Kelli mahalliy fuqaro bilan otishmaga kirishgan va u tomondan yaralangan. OAV bu shaxs 55 yoshli Stiven Uilford ekanini ma'lum qilgan.     

CNN telekanalining ma'lum qilishicha, otishmada yaralangan 14 kishi, jumladan bir necha bola shifoxonada qolmoqda. Ulardan kamida 10 nafarining ahvoli juda og‘ir.

Ruger miltig‘i bilan qurollangan Kelli 5 noyabrda San-Antonio shahri yaqinidagi Sazerlend-Springs shaharchasida joylashgan birinchi baptist cherkoviga bostirib kirib, u yerdagi odamlarni o‘qqa tuta boshlagan. Oqibatda 26 kishi halok bo‘lgan, 20 ga yaqin kishi jarohat olgan. 

Keyinroq ma'lum bo‘lishicha, Kelli 2014 yilda AQSh qurolli kuchlaridan ustavga zid harakatlari uchun iste'foga chiqarilgan va 12 oylik qamoq jazosiga mahkum qilingan.