Saudiya Arabistoni hukumati shahzodalardan biri qo‘lga olish chog‘ida o‘ldirilganini tasdiqlamadi

Saudiya Arabistoni hukumati qirollik xonadoni a'zolaridan biri politsiya tomonidan otib o‘ldirilgani haqidagi xabarni rad etdi. Bu haqda Daily Mail nashri xabar bermoqda.

Hukumat vakilining so‘zlariga ko‘ra, OAVda aytilganidek, saudiyalik shahzodalardan biri qo‘lga olish vaqtida qarshilik ko‘rsatgani uchun otib o‘ldirilmagan, u ayni vaqtda «tirik va sog‘».

Bundan avvalroq mahalliy nashrlar 44 yoshli shahzoda Abdulaziz ibn Fahd politsiyachilarga qarshilik ko‘rsatganida o‘q tegishi oqibatida halok bo‘lganini yozgandi.

Shuningdek, bu shahzoda Livanning sobiq bosh vaziri Saad Haririyga tegishli bo‘lgan Saudi Oger Ltd kompaniyasi ishiga «aralashgani» qo‘shimcha qilingan.

Bundan avvalroq saudiyalik shahzodalardan biri Mansur ibn Mukrin vertolyot halokati oqibatida halok bo‘lgandi.

5 noyabr kuni Saudiya Arabistonida 4 vazir va 11 shahzoda korrupsiyada ayblanib qo‘lga olindi.

Qatar nashri Saudiya Arabistonidagi bu ishlarni «Taxtlar o‘yini» seriali voqealari bilan taqqosladi.