Telman Ismoilov qotilliklarni tashkillashtirish bo‘yicha xalqaro qidiruvga berildi

Moskvaning Basman sudi tadbirkor hamda Cherkizov bozorining sobiq egasi Telman Ismoilovni sirtdan hibsga oldi hamda xalqaro qidiruvga e'lon qildi. Bu haqda «Interfaks»ga uning advokati Marina Rusakova xabar berdi.

«Uning hibsga olinishi bo‘yicha noqonuniy qaror 30 oktabr kuni qabul qilindi. Moskva shahar sudiga u bo‘yicha shikoyat arizasi yuborildi. Shikoyatni apellyatsion tartibda ko‘rib chiqish 15 noyabrga belgilangan», - deya aytib o‘tdi Rusakova.

Ismoilov ikkita qotillikni tashkillashtirish va qurolning noqonuniy aylanishida ayblanmoqda. Qo‘shimcha tafsilotlar ochiqlanmagan.

Eslatib o‘tamiz, joriy yilning yanvar oyida tadbirkor Telman Ismoilov o‘zining bankrotlikka uchrashi yuzasidan arz qilgandi.