Oksford islom tadqiqotlari markazi direktori O‘zbekistonga keldi

O‘zbekiston musulmonlari idorasida Oksford islom tadqiqotlari markazi (Buyuk Britaniya) direktori doktor Farxan Ahmad Nizomiy, markaz ilmiy xodimi, doktor Talal Al-Azim bilan uchrashuv bo‘lib o‘tdi. 

Mehmonlarni Din ishlari bo‘yicha qo‘mita raisi O.Yusupov, O‘zbekiston musulmonlari idorasi raisi, muftiy U.Alimov, O‘zbekistondagi Islom sivilizatsiyasi markazi direktori Sh.Minovarov, Imom Buxoriy xalqaro ilmiy-tadqiqot markazi direktori Sh.Ziyodov, Fanlar Akademiyasi vitse-prezidenti B.Abduhalimov, Toshkent islom universiteti rektori R.Abdullayev hamda Toshkent Davlat sharqshunoslik instituti rektori A.Mannonov qabul qildi.

Din ishlari bo‘yicha qo‘mita raisi O.Yusupov mehmonlarni qutlab, qisqacha O‘zbekistonda amalga oshirilayotgan islohotlar, xususan turli din va millat vakillarining ahil hayot kechirishlari va faoliyati, bu borada Respublika rahbariyati tomonidan olib borilayotgan ishlar hamda Din ishlari bo‘yicha qo‘mita haqida ma'lumot berdi. Suhbatda prezidentning BMT sessiyasidagi nutqlarida tinchlikparvar islom dini mavzusiga berilgan e'tibor, islom dinining asl mohiyatini ochib berish uchun «Ma'rifat va diniy bag‘rikenglik» rezolyutsiyasini qabul qilish takliflari haqida ma'lumot berdi.

Shuningdek, Respublikada keng qamrovda olib borilayotgan iqtisodiy va ijtimoiy islohotlar, jumladan diniy erkinlik, ma'naviy-ma'rifiy muhitni barqarorlashtirish masalasiga to‘xtalib, prezident tashabbusi bilan tashkil etilgan Toshkentdagi Islom sivilizatsiyasi markazi, Termizdagi Termiziy va Samarqanddagi Imom Buxoriy xalqaro ilmiy-tadqiqot markazlari haqida to‘xtalib o‘tdi. Oksford islom tadqiqotlari markazining obro‘si, ulkan tajribasi va faoliyat qamrovini e'tiborga olgan holda, ushbu markazlarning o‘zaro hamkorligi samarali va manfaatli bo‘lishini bildirdi.

F.Nizomiy qabul uchun minnatdorchilik bildirarkan, O‘zbekistonni o‘zining ikkinchi vatanidek bilishini aytdi. O‘zbekiston ulamolarining Islom sivilizatsiyasiga qo‘shgan ulkan hissasini butun musulmon olami bilishi, islom tarixi olimi sifatida F.Nizomiy yuksak baholashi va e'tirof etishini bildirdi. 

Uchrashuv nihoyasida, mehmonlarga «O‘zbekiston bag‘rikeng diyor» kitobi hamda esdalik sovg‘alari topshirildi. O‘z o‘rnida F.Nizomiy  suhbat qatnashchilariga Oksford islom tadqiqotlari markazi haqidagi ma'lumotlar va dasturlar to‘plamini taqdim qildi. So‘ng O‘zbekistondagi Islom sivilizatsiyasi markazi, Toshkent islom universiteti, Imom Buxoriy xalqaro ilmiy-tadqiqot markazi va Oksford islom tadqiqotlari markazi o‘rtasida hamkorlik memorandumini rasmiy imzolash marosimi o‘tkazildi. 

2017 yil 4 dekabr kuni esa O‘zbekiston Respublikasi Oliy Majlisi Senatida O‘zbekiston Respublikasi Oliy Majlisi Senati raisining birinchi o‘rinbosari S.Safoyev va Oksford Islom tadqiqot markazi direktori F.Nizomiy o‘rtasida uchrashuv bo‘lib o‘tdi.

Uchrashuv davomida mehmon mamlakatda O‘zbekiston Respublikasi prezidenti Sh.Mirziyoyev rahbarligida barcha sohada amalga oshirilayotgan tub islohotlar, shu jumladan, mamlakat iqtisodiyotini erkinlashtirish va diversifikatsiyalashni davom ettirish, investitsiya muhitini yaxshilash hamda davlat boshqaruvi organlari tizimini isloh qilish borasida ko‘rilayotgan chora-tadbirlardan batafsil xabardor etildi.

Britaniyalik mehmon san'at, gumanitar va ijtimoiy fanlar sohasida Islom diniga oid ilmiy-tadqiqot loyihalarini amalga oshirishda hamkorlikni izchil davom ettirishga tayyor ekanini bildirdi.