2025-yilda Oʻzbekiston Prezidenti administratsiyasi rahbari Saida Mirziyoyeva ishtirokida Oksford universitetida oʻzbek tili dasturi ochilgan edi. Bugun, 31-avgust kuni ushbu dasturda oʻqiyotgan Oksford talabalari uchun Oʻzbekistondagi yozgi maktab tashabbusiga start berildi.
Bir oy davomida Oksford talabalari Oʻzbekistonda oʻzbek tili va madaniyatini oʻrganish bilan birga, mamlakatning boy tarixi bilan yaqindan tanishadi.
Yozgi maktab dasturidan Toshkent, Samarqand va Buxoroga safarlar, madaniy tadbirlar va oʻzbek tili boʻyicha darslar oʻrin olgan.
Eslatib oʻtamiz, Oksforddagi oʻzbek tili dasturi ishtirokchilariga nafaqat zamonaviy oʻzbek tili, balki qadimgi oʻzbek – chigʻatoy tili ham oʻrgatiladi. Bu esa Oksford universitetini oʻquv dasturiga oʻzbek va chigʻatoy tillarini kiritgan birinchi va yagona universitetga aylantirgan.
