Saakashvili Poroshenkoni iste'foga ketishga chaqirdi 

Gruziyaning sobiq prezidenti Mixail Saakashvili Ukraina prezidenti Pyotr Poroshenkoga yangi murojaat yo‘lladi. U murojaatida Poroshenkoni ko‘ngilli tarzda iste'foga ketishga chaqirdi.

19 dekabrda Ukraina prezidentining matbuot kotibi Saakashvilining Poroshenkoga yo‘llagan maktubini oshkor qilgandi. Saakashvili unda mamlakatdagi vaziyatni izdan chiqarmaslikka va'da bergan va muzokaralar taklif qilgan.   

Saakashvili birinchi murojaati oshkor qilinishiga javoban Facebook’da ikkinchi murojaatni joylashtirdi. Saakashvili unda Poroshenkoga birinchi murojaatida “ixtilofni hal qilishning yo‘llarini birgalikda qidirishni” taklif qilganini eslab o‘tgan. “Biroq buning o‘rniga sizga yo‘llagan maktubimni oshkor qildingiz. Men qarshimasman. Unda men yashirmoqchi bo‘lgan biror-bir narsa yo‘q. Biroq siz bu bilan or-nomusingiz yo‘qligini ko‘rsatdingiz”, deb yozgan Saakashvili.

Saakashvili prezidentni u va uning tarafdorlari “Ukrainani yaxshi tomonga o‘zgartirishga qodir emasliklarini” tan olishga chaqirgan. Uning fikricha, Poroshenkoning iste'foga ketishi “mamlakatdagi siyosiy inqirozni yengib o‘tishdagi deyarli oxirgi imkoniyatdir”. “Ko‘ngilli tarzda, xalq istagi oldida boshini eggancha iste'foga ketadigan prezident jazoning yumshatilishi va afv etilishga umid qilishi mumkin”, deb murojaat qilgan Saakashvili.

Saakashvilining fikricha, Poroshenko tarixga “yangi Ukrainaning asoschisi” sifatida kirolmaydi. Uning ta'kidlashicha, 54 foiz ukrainaliklar Poroshenkoning davlatni boshqarishidan ko‘ngillari qolgan, buning sababi islohotlar o‘tkazish, korrupsiyaga qarshi kurashish, biznes uchun qulay sharoitlarni yaratishni istamaslikdir. “Seni faqat bir narsa tashvishlantiradi – sening milliardlaring. Sen ular uchun har qanday qurbonga borishga, aldashga tayyorsan”, deb aytgan Saakashvili.