Gurjiston sobiq prezidenti Mixail Saakashvili 2022 yildan buyon saqlanayotgan Tbilisidagi klinikadan chiqarildi va «12-sonli tuzatish muassasasi»ga (Rustavi qamog‘iga) umumiy tartibda jazoni o‘tash uchun qaytarildi. Bu haqda 12 noyabr kuni Gurjiston Maxsus penitensiar xizmati Facebook’da xabar berdi.
Xabarda aytilishicha, Saakashvilining sog‘ligi hozirda «qanoatlanarli», shu bois u statsionar davolanishga endilikda «muhtoj emas». Bu borada xizmat siyosatchining davolovchi shifokorining xulosasiga tayanganini qayd etdi.
Sobiq prezident 2021 yil 29 sentabrga o‘tar kechasi Gurjistonga qaytgan — tergov ma’lumotiga ko‘ra, u «Vilnyus» paromi orqali Poti portiga maxfiy kelgan va yuk mashinasida yashiringan. 2 oktyabr kungi saylovlarda hukmron «Gurjiston orzusi» partiyasiga qarshi ovoz berishga chaqiriq bilan Saakashvili Facebook’da video joyladi. Keyingi videoda u ovoz berishlarni soxtalashtirishlar haqida taxmin qilib, norozilik namoyishlariga chaqirdi. Politsiya va maxsus xizmatlar 1 oktyabr kuni siyosatchining turgan joyini aniqladi — u Tbilisida kelgan treyler haydovchisining kvartirasida ushlandi va hibsga olindi.
2021 yil oktyabrda Saakashvili qamoqda ochlik e’lon qildi — u 50 kun davom etdi va faqat Goridagi harbiy gospitalga reabilitatsiya uchun o‘tkazilgandan so‘ng to‘xtadi. Biroq 2022 yil 21 fevral kuni qamoqqa qaytarilgandan keyin siyosatchi yana ochlik boshladi — 20 kun. 12 may kuni sog‘ligi yomonlashgani sababli u Tbilisidgi xususiy «Vivamedi» klinikasiga o‘tkazildi va u yerda alohida palatada saqlandi. 2023 yil 31 yanvar kuni Ukraina Oliy Radasi deputati Yelizaveta Yasko Saakashvilini o‘ta og‘ir ahvolda reanimatsiyaga o‘tkazishganini aytdi. Klinika buni rad etgan.
Hozir Saakashvili deputat Valeriy Gelashvilini kaltaklash ishi va bank xodimi Sandro Girgvlianini o‘ldirganlar ustidan ish bo‘yicha tayinlangan olti yillik jazoni o‘tamoqda. 2025 yil 12 mart kuni Tbilisi shahar sudi, shuningdek, davlat budjetiga tegishli 9 mln lari (taxminan 3 mln yevro) mablag‘ni talon-toroj qilish ishi bo‘yicha sobiq prezidentni to‘qqiz yilga ozodlikdan mahrum etdi. 17 mart kuni o‘sha sud unga davlat chegarasini noqonuniy kesib o‘tish ishi bo‘yicha yana 4,5 yil berdi. Jazolarni qisman qo‘shish natijasida siyosatchining umumiy qamoq muddati 12 yil 6 oyga yetdi.
