2016 yilning sentabrida Nyu-York va Nyu-Jyersida teraktlar amalga oshirganlikda ayblanayotgan Ahmad Rahimiy qamoqxonada o‘zi bilan birga bo‘lgan mahbuslar orasida terrorizm targ‘ibotini olib borgan.
Bu haqda CNN telekanali prokuraturaga tayangan holda xabar qilmoqda.
Ta'kidlanishicha, u terrorchilik targ‘ibotiga ega materiallar, jumladan «Al-Qoida» terrorchilik guruhi rahbari Osama bin Lodinning chiqishlari hamda bombalarni tayyorlash bo‘yicha qo‘llanmalar nusxalarini tarqatib kelgan.
«Rahimiy Metropolitan axloq tuzatish markazidagi mahbuslarni radikallashtirishga harakat qilgan, jumladan bunga terrorchilik tashkilotlari materiallarini tarqatish yo‘li bilan erishmoqchi bo‘lgan», - deya ma'lum qildi prokuror.
Telekompaniya ma'lumotlariga ko‘ra, terrorchilik materiallariga ega disklar ikki nafar mahbusdan topilgan.
