Sodiq Safoyev: O‘zbekiston BMT Davlat xizmatlari mukofoti tanlovida ishtirok etishi kerak

O‘zbekiston Respublikasi Oliy Majlisi Senati raisining birinchi o‘rinbosari Sodiq Safoyev "Davlat va jamiyat boshqaruvida fuqarolar ishtirokini ta'minlashning ustuvor vazifalari: ilg‘or g‘oyalar, innovatsiya va texnologiyalar" mavzuida xalqaro anjuman vaqtida O‘zbekiston BMTning davlat xizmatlari mukofoti (The United Nations Public Service Awards) tanlovida ishtirok etishi lozimligini qayd etdi. Bu haqda Kun.uz muxbiri xabar beradi. 

"BMT tomonidan har yili "The United Nations Public Service Awards" tanlovi tashkil etiladi. O‘ylaymanki, O‘zbekistonning ham mazkur tanlovda ishtirok etish vaqti keldi. Joriy yilning kuzida yurtimizda amalga oshirilayotgan xalq bilan muloqot jarayonlari, virtual qabulxonalar faoliyati bo‘yicha o‘z tadqiqotimizni qilamiz. Bugungi anjuman ish rejasiga mana shu masalani ham kiritib qo‘yishni taklif qilaman. 

Fursatdan foydalanib, yurtimizdagi xorijiy davlatlar elchixonalari, xalqaro tashkilotlar vakillarini hammkorlikka chaqirgan holda bu masalaga ko‘proq e'tibor qaratishlarini so‘rab qolaman", degan Sodiq Safoyev.