BMT Markaziy Osiyoda suv resurslarini boshqarishga oid loyihalarga ko‘mak beradi

BMT Markaziy Osiyo va Afg‘onistonda suv resurslarini boshqarish va energetikaga oid loyihalarni amalga oshirishda ko‘mak berishga tayyor ekanini bildirdi. Bu haqda BMT Bosh kotibi Antoniu Guterrish juma kuni o‘tkazilgan BMT XK yig‘ilishida ma'lum qildi.

BMT Bosh kotibi «mintaqa iqtisodiy rivojlanishiga fundamental muhim ta'sirga ega» suv resurslarini boshqarish bo‘yicha olib borilayotgan ishlarni alohida ta'kidlab o‘tdi.

Antoniu Guterrishning aytishicha, so‘nggi o‘n yil ichida Tojikiston hududidagi muzliklarning deyarli 30 foizi erib ketgan.

«Orol dengizi esa bugungidan ham katta muammolarga duchor bo‘lishi mumkin. Ekologik qashshoqlik mintaqa davlatlarini yaqindan hamkorlik qilishga undaydi», deb fikr bildirdi u.

Ma'lumot uchun, 2011 yil BMT tomonidan Markaziy Osiyoda terrorizmga qarshi kurash strategiyasi qabul qilingan bo‘lib, hujjat mintaqada iqtisodiy rivojlanish va hamkorlik shartlariga o‘zgarish olib kirgan.

Eslatib o‘tamiz, O‘zbekiston Respublikasi Tashqi ishlar vaziri Abdulaziz Komilov mazkur yig‘ilishda ishtirok etib, navbatdagi Afg‘oniston masalasini Toshkent shahrida muhokama etishni taklif qilgandi.