«Barselona»ning nohaq goli, rekordchi Ronaldu va eng ahmoqona het-trik. Ispaniyada tur voqealari

«Tribuna» Ispaniya chempionatining 21-turi yakunlarini keltiradi.

La Liga rekordi va penaltisiz 2 yil

«Barselona» kutilmaganda «Alaves»ga qarshi o‘yinda muammolarga duch keldi. Birinchi bo‘limning birinchi qismida gol o‘tkazib yuborgan kataloniyaliklar faqat o‘yinning oxirgi choragida vaziyatni o‘zgartira olishdi. Yana Suares va yana Messi qutqardi. O‘yin avvalida jamoaning sobiq futbolchisi Erik Abidal qo‘lidan La Liganing dekabr oyidagi eng yaxshi futbolchisi uchun atalgan sovrinni qabul qilib olgan urugvaylik hujumchi qatorasiga sakkizinchi o‘yinda ham gol urdi. Bunday ko‘rsatkich bilan joriy mavsumda Yevropadagi hech bir futbolchi maqtana olmaydi. Argentinalik futbolchi esa o‘yinga qo‘shib berilgan daqiqalarda jarima zarbasidan g‘alaba golini urdi. Bu gol uning chempionatning joriy mavsumdagi 20-goliga aylandi. Bu ham La Liga rekordi, shu vaqtgacha hech bir futbolchi qatorasiga 10 mavsumda uzluksiz kamida yigirtmatadan kam gol urmagandi.

Tan olish kerakki, Leoning goli nohaq belgilangan jarima zarbasi orqali ro‘y berdi. Kataloniyaliklar hujum qilayotgan vaqtda Pako Alkaserga qo‘pollik ishlatildi, ammo u to‘p o‘ziga uzatilgan vaqtda ofsayd holatida edi.

«Alaves»da hakamga norozilik bildirish uchun yana bir sabab bor - Munirning zarbasidan keyin to‘p jarima maydoni ichida Umtitining qo‘liga tegdi, lekin penalti belgilanmadi.

E'tiborli jihati, «Barselona» darvozasiga 74 turdan buyon penalti belgilanmagan, kataloniyaliklar darvozasi tomon oxirgi penalti ikki yil muqaddam, 2016 yilning 14 fevralida qo‘yilgandi.

«Mestalya»dagi parokandalik

Zidanning «Real»dagi taqdiriga oydinlik kiritiladigan «PSJ»ga qarshi o‘yinga ikki hafta qolganida madridliklar jamoani Ispaniya Kubogidan chiqarib yuborgan «Leganes»ga tashakkur bildirsa arziydi. Bu jamoadan mag‘lubiyatdan keyin «Real» o‘ziga keldi va Valensiyada yirik g‘alabaga erishdi. «Real» oxirgi 3 mavsumda «Mestalya»dan g‘alaba bilan qaytmayotgandi. Qolaversa, Ispaniya Kubogidan chiqib ketgan jamoada «PSJ»ga qarshi o‘yinga tayyorlanish uchun ko‘proq vaqt bo‘ladi.

«Valensiya»ga qarshi o‘yinda «Real»ning g‘alabasini Ronalduning penaltidan urgan ikki goli (ikki penalti ham haqli qo‘yildi) va Zidanning to‘g‘ri o‘yinchi almashtirishlari ta'minladi: u maydonga tashlagan Asensio va Kovachich Marselo va Modrichga golli pas uzatdi. «Valensiya»ning yagona goli Santi Mina tomonidan urildi, u birinchi bo‘limda hisobni tenglashtirgandi. Ammo keyinchalik mezbonlar Keylor Navas darvozasi oldida aytarli xavfli hujumlar uyushtirishmadi. Mavsum davomida ma'lum muddat turnir jadvalida peshqadamlik qilgan «ko‘rshapalaklar» jamoasi chempionlik poygasidan chiqib ketmoqda. Ayni vaqtda zaxirada bitta o‘yini bor «Real» turnir jadvalida valensiyaliklardan 2 ochko ortda qolmoqda.

«Vilyarreal» yevrokuboklar sari

«Valensiya»ning qo‘lini ko‘tarishi «Vilyarreal»ning kuchli to‘rtlikka kirish imkoniyatlarini paydo qilmoqda. «Sariq submarinalar» «Real Sosedad»ga qarshi o‘yinning 20-daqiqasiga keliboq 3:0 hisobida oldinga chiqib oldi. Mehmonlar keyinroq nimalardir qilishga urinishdi, ammo o‘yin 4:2 hisobida mezbonlar g‘alabasi bilan tugadi. Endi «Vilyarreal» uchinchi o‘rindagi «Valensiya»dan atigi 3 ochko ortda. Barchasi 36-turda kechadigan Valensiya derbisida hal bo‘lishi mumkin.

Raqibni qo‘rqitish uchun o‘zingga ur

«Espanol» himoyachisi Mario Ermoso Primera doirasida «Leganes»ga qarshi kechgan va jamoasining 2:3 hisobidagi mag‘lubiyati bilan yakunlangan o‘yinda 3ta gol urdi. Ammo u gollardan ikkitasini o‘z jamoasi darvozasiga yo‘llagan. Ushbu 22 yoshli ispaniyalik futbolchi 11- va 82-daqiqalarda avtogollarga mualliflik qildi, 88-daqiqada «Leganes» darvozasini ishg‘ol qildi.

Shu tariqa, Ermoso primerada bunday ko‘rsatkich qayd etgan ilk futbolchiga aylandi. Liga tashkil etilgan 1928 yildan buyon bir futbolchi o‘z darvozasiga ikki gol va raqib darvozasiga bir gol urishi hali kuzatilmagandi.

Tur o‘yinlari

«Atletik» - «Eybar» - 1:1 (0:0).
Gollar: Aduris, 50 (1:0). Kike, 73 (1:1).
«Deportivo» - «Levante» - 2:2 (2:0).
Gollar: Adrian, 19 (1:0). Andone, 45 (2:0). Ivi Lopes, 80 (2:1). Ivi Lopes, 84 (2:2).
Chetlatish: Borxes (Deportivo), 34.
«Valensiya» - «Real» - 1:4 (0:2).
Gollar: Krishtianu Ronaldu, 16 - penalti (0:1). Krishtianu Ronaldu, 38 - penalti (0:2). Mina, 58 (1:2). Marselu, 84 (1:3). Kroos, 89 (1:4).
«Malaga» - «Jirona» - 0:0.
Chetlatish: Chori Kastro (Malaga), 78.
«Vilyarreal» - «Real Sosedad» - 4:2 (4:1).
Gollar: Viktor Ruis, 5 (1:0). Pablo Fornals, 17 (2:0). Bakka, 20 (3:0). Lorente, 24 (3:1). Samuel Kastilexo, 34 (4:1). Villian Joze, 58 (4:2).
«Leganes» - «Espanol» - 3:2 (1:0).
Gollar: Ermoso, 11 - avtogol (1:0). Navarro, 49 (1:1). Gerrero, 69 (2:1). Ermoso, 82 - avtogol (3:1). Ermoso, 88 (3:2).
«Atletiko» - «Las-Palmas» - 3:0 (0:0).
Gollar: Grizmann, 61 (1:0). Fernando Torres, 73 (2:0). Partey, 88 (3:0).
«Sevilya» - «Xetafe» - 1:1 (0:0).
Gollar: Muriel, 72 (1:0). Anxel, 90+3 (1:1).
«Barselona» - «Alaves» - 2:1 (0:1).
Gollar: Gvidetti, 23 (0:1). Luis Suares, 72 (1:1). Messi, 84 (2:1).
«Selta» – «Betis 3:2» (1:0, 2:2)
Gollar: 1:0 – 12 Aspas, 2:0 – 57 Maksi Gomes, 2:1 – 71 Leon, 3:1 – 79 Aspas, 3:2 – 90, penalti Guardado.